19 December 2023, Agartala: Janajati Suraksha Manch, Tripura hasteni Convener Shanti Bikash Chakmano Show Cause Notice rokha TTAADC hapang....
Satai klaiywk, thangnai 19 November 2023, Janajati Suraksha Manch, Tripura hasteni bwkhaktwi Agartala Press Clubgo koktmathungnai pana ringoi saklaikha, Scheduled Tribesni bisingo Christian tongkatharno paitoknairokni ST Status cancel khlainani ongthwk hinoi khorang tisagwi phainai 25 December 2023 ‘Delisting Rally’ rwgwi Agartalani Astabal thwngkholago himbotok aro garakhlai lukukuthung-mwng pana songchajaknai. Bok aiphu koktmathungnai panago ibono saka, je borok sakni tongkatharno khibiywi arokothe tongkathargo hagwi sakni sirisitini tongmwng-chamwng, hukumu-mukumurokno swkmwknani nai tongkha aro STni sep-sap aro Minorityni sep-sap lagwi tongwk ibo raida chaiya. Aini bagoi bokno Bharatni elembakno amend khlaiywi STni sep-sap lamanino konoroni nangwk hinoi.
JSMni ibotwi saklaimanino hasteni ST Christianrokni bisingo uanama, krima haplainani chengkha. Ibono kebengoi kabangma lukurok khorang tisaka aro bokni ibotwi saklaimanino rwksagwi lanani ongthwk hinoibo salaika.
Bok ibotwikhlai saklaimani bisingtwi ST Christian ST bai Non-Christian STrokni bisingo ualai-soklai khlaironani, thainchano swkaknani naiywk hinoi tabok Janajati Suraksha Manchani sakago silchamwng twbwiywi khorang tisalaimani nujakkha. Aini bagoi thangnai 23 November 2023 salmarigo Janajati Suraksha Mancha aro Tripura haste convener Shanti Bikash Chakmani bwmwngoi complaint khlaika Jirania Dasharam Kamini John Debbarma.
Ijang Shanti Bikash Chakma ongkha TTAADC hapangni Head Clerkni sebok khlainai khorokcha. Dhalai hangkorni Ganganagar RD Block daiyo bini sebok khlaimani thai. Bo khorokcha hapangni sebok khlainai ongoi ibotwikhlai tongkatharni bwmwngoi thainchani halokno swbaina naimani bai Tripura Civil Services (Conduct) Rules, 1988 kerong raida sabaikha hinoi silchamwng twbwiywi iboni Rules 3(i), 5, 6, 7 rwgwi bono sebokno karethwk hinoi TTAADC hapangni daiyo complaint khlaika aro IPC Section 153 (A), 153 (B), 295 (A), 504, 505 aro 506 thepagwi bini sakago krak majra roni ongthwk hinoi West Agartala Police Station daiyobo FIR khlaika. Iboni olo i patimwngno amjogoi naiywi Shanti Bikash Chakmano Show-Cause Notice rokha TTAADC hapang.
Thangnai 13 December salmarigo TTAADCni Chief Executive Officerni habanokni siming No.F.7-2(159)/ADC/GL/2011/23,220-28, Dated, Khumulwng, 13/12/2023 saklaimwng balaini bisingtwi Shanti Bikash Chakmano Show Cause Notice rokha. I notice manmani salsnini bisingo iboni kokphirokmwng ronani bagoibo sajakkha noticeni bisingtwi.
No comments