Hasteni ST Dopharokni Mwngni Suitaino Jai-Jai Khlaima Rwgwi Kokmalaima Pana

19 December 2023, Agartala: Tripura hasteni Scheduled Tribesrokni bwmwngni suitairok barikhlai koro-kuthu ongmani nujagwk. Iborok jora kalok...

19 December 2023, Agartala: Tripura hasteni Scheduled Tribesrokni bwmwngni suitairok barikhlai koro-kuthu ongmani nujagwk. Iborok jora kalokma rwngwibo jai-jaikhlai naikani khlaijakya ongoi tongwk. Suitai korojakno jai-jai khlaijakyani bagoi kabangma sep-sap lathanigo jwngjal achaiywimano aro achaiywk. Aini bagoi suitai jai-jaikhlai charonani nangsogwk!

Ibotwi jwngjalrokno yak kakroni bagoi thangnai 15 December salmarini diphrwkni damsa jorani siming Tripura hasteni Tribal Welfare Departmentni bwkhaktwi Agartala Gurkhabastini Pragna Bhawanni Hall No.3 daiyo hasteni chorok ST dophani hodaokra aro okra-chakrarokno lagwi songchajakkha salchani ‘Workshop cum discussion for correction of spelling mistakes of Tribes/Sub-Tribes/Communities or Surnames etc. in the Scheduled Tribes list of Tripura’. 

Bwphang bwsago toi lumani bisingtwi i kokmalaima panano chengoi rokha MDC Bidyut Debbarma, TTAADCni Administrative Reforms Committeeni adong Bijoy Kumar Hrangkhawl, MLA Pramod Reang, Tribal Welfare Departmentni dagephang S. Prabhu, IFS, Kokborok aro Borok Bangthaya kok dagekhongni dagephang Ratnajit Debbarma, IAS song. 

I panago Tribal Welfare Departmentni montri Bikash Debbarma phaima tongmani phaiyoi sopailiyani bagoi MDC Bidyut Debbarmani achokphang songcha-jakkha salchani i kokmalaima pana. Iro chorok ST dopharokni bwmwngni koro-kuthu ongjak suitai rokno charogoi tisani bagoi kokmalama salaijakkha aro koklam chaplaijakkha. Je je ST dopharokni bwmwngni suitai koro-kuthu ongjak tong bok chorokno katal khlai suitai ephagwi rolaikha.

Chaimal- Saimar, Garoo- Garo, Bengshel- Bongcher, Dub- Dap/Dab, Kalai- Koloy/Kalai, Karbong- Korbong, Lengui- Langkai, Mussum- Molsom/Malsom, Sukuchep- Sakhichep, Thangchep- Thankichep, Rangkole- Hrangkhawl, Hrangkhol, Ranchan- Rangchal, Mog- Mog/Mag, Murashing- Murasing, Riang- Reang-Riang, Uchai- Uchoi/Uchai ibohaiklai correction khlainani bagoi katal suitai bai bwmwng suiywi yapharjakkha. 

Ibo badebo ST listni Sl.No 18 daiyo tongnai Tripura, Tripuri & Tipperani bisingo bana TRIPURA suinairokno kothe khlai Tripura Community, Debbarma suinairokno Tripuri (Debbarma) Community snamnani aro Tipperano tanoi rohornani bagoi Tripura dopha bai Debbarma dophani okra-chakrarokni phaichingtwi tisajakkha. I kokbomano lagwi olo sukrugwi kok salaijaknai hinoi kok rokha Tribal Welfare Departmentni bwkhaktwi.

Iro Tripura dophani ongoi dophani Naran Birendra Tripura, Naran yakchu Burba Mohan Tripura, Naran Pomang Roaja Councilni Kasku suikrwng Sachlang Tripura, Tripura Chubalai Buthu, Central Committeeni tangphang Taranisen Tripura aro Tripura Writers’ Forum, Central Committeeni twiphang Dharinjoy Tripura thangoi majakkha.