'HATALNI BOYAR' KOKBOROK KOKRABAI BALAI PHIYOGOI ROJAKKHA

14 November 2023, Agartala:  Kokborok kokrabaini hamkraini bagoi tabok tlwk tlwk baskango yapri semani nujagoi tongwk. Katal katal srwngnair...

14 November 2023, Agartala: Kokborok kokrabaini hamkraini bagoi tabok tlwk tlwk baskango yapri semani nujagoi tongwk. Katal katal srwngnairok, katal jorani kokrabaino hamjaknairok tabok Kokborok kokni hamkraino arobo phuarnani bagoi suaimwng- khaimungo yapri selai tongwk. 

Bana suimwngo simingya, Kokborok kokrabai balai karelaimanibo nujagoi tongwk. Miya Hatal Kokborok Kokrwbai Bodol (HKKB) mothani chaitokmani bai o Mothani habanogo phiyogoi rojakkha 'Hatalni Boyar' Kokborok kokrabai balai.

I kokrabai balaino kokmithingka Subendhu Debbarma, Dhiman Debbarma, Prijesh Debbarma, Rostam Debbarma.

Miyani i kokrabai balai phiyogoi roma panago i kokrabai balaino kokmithingnairokni badebo 'Hatal Kokborok Kokrwbai Bodol'ni adong Arnal Debbarma, Boyar Debbarma, Bishu Debbarma song.

I kokrabai balai bisigo kangsa khlai karejago. Thangnai bisigono i kokrabai balaini yapri himna chengo. Takhlai i kokrabai balaini noi bwkrang karejakkha.

I kokrabai balaini bisingtwi Kokborok kokrabaini samwng homwng jeswk phuarjakkha iswkno kokrabaini hapargo sep makha katal katal suinai-khainai aro kokrabaino hamjaknairok.