12 November 2023, Hakutoisa: Bisipoti Tripura hasteni chorok Tiprasa amchaiyo jesa ter, pana rwgwi horo tir-juar, jandi-munda thwnglaimani ...
12 November 2023, Hakutoisa: Bisipoti Tripura hasteni chorok Tiprasa amchaiyo jesa ter, pana rwgwi horo tir-juar, jandi-munda thwnglaimani nujakgo. Ibobai hoda-dophani tongmwng chamwng salni slai sal hamya lamago thangoi tongwk.
Terni bwmwngoi ter committeerom jandi-munda thwngromani bai amchaini bigra-khangrarok bigrani aro bigra khao. Ibobai nukhungni jwngjal, amchaini jwngjal, Hodani jwngjal, dophani jwngjal achaiywk. Bana jandi-munda simingya, teer thwnglaimani, tas thwnglaimanibo iswkno nangkha. Lama kore-kara, phalnokrogo achoklai tas thwnglaimani, aro teer thwnglaimani ibo dophani bagoi barikhlai hamya mandwi.
Ibotwi teer thwngma, tas thwngma, jandi-munda thwngma bana Hakutoisago simingya, hasteni chorok Tiprasa amchaiyono ibotwijati thwngmwng thwnglaimani nujagoi tongwk. Jora tongsani ibono daktwino mwthakni nangsogoi tongkha.
Aini bagoi takhlaini Barimatai Ter (Diwali) rwgwi horo Hakutwisa amchaiyo jandi-munda mwthwngmano/thwnglaimano mwthaknani krak yapri sedi hinoi khorang tisagwi tini Tripura dophani Deputy Naran ebakhlai Hakutoisa Moyalni Pomang machang Burba Mohan Tripurani twidulmwng bai 'Naran Pomang Roaja Council'ni phaichingtwi Longtrai Valleyni Hakutwisa Police Station daiyo kangsa memorandum balai yapharlaikha.
Police Station daiyo memorandum balai yapharlaiphugo Deputy Naran machang Burba Mohan Tripurani logeo thangoi majakkha amchaini okra Tarini Tripura, UTYAni Kanchan Tripura, NPRCni Nabaranjan Tripura song.
Kokmalama salailaimani olo jandi-munda thangmano aro mwthwngromano mwthaknani/kasonani bagoi Policeni bwkhaktwi krak yapri senani hinoi kok rokha Naran Pomang Roaja Councilni adongrok.
No comments