Bodolandgo Tripura Dophani KHEREBAI MASAMWNG Masagwi Phunuka TSBni Adongrok

18 November 2023, Kokrajhar: Assam hasteni Bodolandni Kokrajhar daiyo songchajak srwngnairokni malaimwng panago majakni bagoi thangoi majakk...

18 November 2023, Kokrajhar: Assam hasteni Bodolandni Kokrajhar daiyo songchajak srwngnairokni malaimwng panago majakni bagoi thangoi majakkha Tripura Swrwngnai Buthu (TSB)ni adongrok.

Thangnai 15 Novemberni siming 17 November jora saltam jora rwngwi Kokrajhar Govt. College Bodo Students’ Literary Societyni chaitokmani songchajakkha ‘Ishan Mushaharyni Bisi Brwichisa Mukumu Sal’ ebakhlai “41st Ishan Mushahary Memorial Day”. 

I sal palaima panago ringkhojagoi thangoi majakkha Tripura hasteni Tripura dophani srwngnairokni motha ‘Tripura Swrwngnai Buthu’ni khorok noichinoi adongni kaisa bodol. Iro Agartala, Gondatwisa, Longtrai Valley Committeeni kwthalaijak TSBni kaisa hukumu bodolrok Kherebai Masamwng masagwi phunuka.

TSB-ni kasku ebakhlai kacham MLA Dhananjoy Tripurani chubamwng bai i hukumu bodol aro srwngnai bodolno twiduloi tlangkha TSB Gondatwisa Divisional Committeeni adong Rabiswar Tripura.

I panago Bodo, Dimasa, Tripurarokni bisingo kok-kokrabai, hukumu-mukumu, laibumarokno rwgwi kokmalama salailaini bagoi i malaimwng.

TSBni bodol thangoi kasokmani olo Bodo dophani srwngnairok bai Tripura dophani srwngnairokni bisingo malailaiywi sinimwng lalaimani olo Bodolandni kabangma jegarok beraiywi phunujakkha.

TSBni I Kherebai Masamwng masanai bodolrokno pana songchanaini bwkhaktwi borombo yapharjakkha.