Miya Horkuthuk Jorago Bobagra Thangoi Malaikha Hasteni Montriokra Bai

5 October 2023, Agartala: miya hor kuthuk jorago Tipra Mothani kacham kasku ebakhlai hani bobagra Pradyot Kishore Manikya arouaisa thangoi m...

5 October 2023, Agartala: miya hor kuthuk jorago Tipra Mothani kacham kasku ebakhlai hani bobagra Pradyot Kishore Manikya arouaisa thangoi malaikha Tripura hasteni montriokra Prof. (Dr.) Manik Saha bai. 

Iboni sakango kabangma kokboma aro bimwng-khaimwngno lagwi bobagra montriokra bai thangwi malaijak.

Miya horo montriokra bai malaiywi paiywi bobagra Pradyot Kishore Manikya koktmathungnairokno saka, i malaimwng thwngrwngni kokno salaini bagoi malaimaniya. I malaimwngo bana TTAADCni hamkraini hamwng-siniya kokno salaini bagoi montriokra bai kokmalama salaijakkha. 

Bobagra aro saka, thwngrwngno lagwi bo bana Delhigo simingse kok salainai, iro salaiya. TTAADCni je je schemerok jai-jai khlai samwngo phnangjakya, iborokno jai-jaikhlai samwngo phnangnani bagoi montriokra bai malaimwng.  Bo TTAADCni lamarokno lagwibo kok salaika, saka bobagra. Bo arobo saka, hasteni budget daiyo TTAADC amchaini bagoi je rang larwkjakkha, ibobai bana sebok khlainairokno salary romani bade aro mwngsa hamkraini samwng khlaimaya! hinoi saka bobagra Pradyot Kishore Manikya.

Mator miya horni damchisa atlogo bobagra hasteni montriokra bai thangoi malaimani koktma auai ongmani olo hasteni thwngrwngni hapargo aro uaisa koktma bobak ongoi kasaka. 

I malaimwng phainai Lok Sabha chongbarini sakango BJP bodolni bagoi jeswk nangmani iswkno nangmani Tipra Mothani bagoibo hinoi baksani khugo kok kasamani nujakkha. Tmwi hinba hagara hapangni daiyo Tiprasarokni bagoi mwngsaswk biywi twbwini thangtanigo hapang BJP bodolno uluk-sakang chubaya tongoise maya! Greater Tipraland, Constitutional Solutions, ADCno morepower rothani, Kokborokno 8th Schedule daiyo dathani bana hagara hapangni daiyo simingse phran tongwk. Aini bagoi TTAADCni hamkraini bagoi kokmalama salaini thango hinphabo I malaimwngo thwngrwngni halok mutunni bwkhai mano!