5 October 2923, Agartala: 'Jorani Khorang' kokrabai balaini bisi chisa achaima sal rwgwi songchajak panago kothe kothe kabangma muk...
Thangnai 2 October salmarigo Agartalani Dasarath Hukumu Srwngnok daiyo songchajak 'Jorani Khorang'ni panano chengoi rokha aro naruaiokra ongoi thangoi majakkha hasteni Tiprasa hamkrai montri Bikash Debbarma.
Iboni olo 'Sunita Mukumu Khagnang Sokat-2023' yapharjakkha. Takhlai bisigo i dasonno yapharjakkha Raman Debbarma bai Bina Debbarmano. I dason manai Raman Debbarma ongkha Kokborok subjectgo Master Degree pore paijak khorokcha bigra mukhungni cherai. Dason manairokno khumbuthup, risa, borombalai aro rang khok ba sai (5 thousand) tisagwi rokha hasteni Tiprasa hamkrai montri Bikash Debbarma.
Hasteni rachapkrwng Bimal Debbarmano mwito khlaiywi takhlai 'Bimal Debbarma Mukumu Sokat-2023' yapharjakkha. Takhlai i dason yapharjakkha rachapkrwng Usha Debbarmano.
Gam number manoi pass khlainaino 'Ramsing Debbarma Mukumu Sokat' yapharjakkha. Takhlai i dasonno yapharjakkha Khatrajoy Tripurno. Khatrajoy Tripura ongkha khorokcha bigra nukhungni cherai ongoibo rwngni gam sepsap mayabadebo takhlai Madhyamik Examinationgo 91% nombor manoi pass khlaika. I dason rothanigo chubachu rokha Er. Biswajit Debbarma. Bo bopha Ramsing Debbarmano mwito khlaiywi I dason ronani yapri seka. I dason tisagwi rophugo Ramsing Debbarmani bahamjuk ebakhlai Er. Biswajit Debbarmani hik Dr. Minati Debbarmabo phai sopaijak.
Ibo badebo dophani ongoi, hasteni ongoi gam samwng-homwng khlaimani bagoi khorokbrwi Tiprasa sikla-chaklirokno borom yapharjakkha. Iboni bisingo tongwk-- Kokborokni muksuma/toke snamkrwng machang Sarat Reang, Cricket thwngkrwng Mani Shankar Murasingh, Bangkokgo songchajak Muythai World Championship bataimwngo Bronze medol majak Rejina Debbarma aro NEET-ni amjokmwngo All Indiago Rank-6 manoi Delni AIMS o poregoi tongnai bukhukjuk Mari Debbarma.
Ibo badebo i panago, chukya nukhungni cherai Swmai Debbarma bo thangnai 2023 bisingo 93% nombor manoi Madhyamik Examination pass khlaimani bagoi bono rang khok noichisa sai (21 thousand) chubachu rokha. Bono i chubachuno tisagwi rokha suikrwng Ajita Tripura.
I sal palaima rwgwi o salni phurung jorago Dasarath Hukumu Srwngnogo cherairokni achogoi rikmwng batailaimwng (Drawing Competition) songchajakkha. Iro Nursuryni siming KG-II, Class-I ni siming Class-III jorani srwngnairokni bisingo bataimwng songchajakkha. Jomangoi khorok brwichar (48) srwngnairok phaiywi bataiphaika. Iboni bisingo Nursuryni siming KG-II jora batainai khorok noichitham (23) aro Class-I ni siming Class-III jora batainai khorok noichiba (25).
Nursuryni siming KG-II jorani bataimwngo kaplai ongnairok ongkha-
Chasmai Tripura (1st Position)
Anisha Debbarma (2nd Position)
Mritsa Debbarma (3rd Position)
Class-I ni siming Class-III jorani bataimwngo kaplai ongnairok ongkha-
Edward Debbarma (1st Position)
Animari Debbarma (2nd Position)
Salbrum Debbarma (3rd Position).
Kaplai ongnairokno borombalai aro trophy yapharjakkha. Bokno borombalai bai trophy tisagwi rokha Tribal Research and Cultural Instituteni dagephang yakchu Naba Kumar Debbarma. I rikmwng batailaimwng daiyo batainai chorok srwngnairoknobo borom balai yapharjakkha.
Bini badebo i panago College berem "Speech Competition" ongkha. Jomangoi hasteni kaisni collegeni khoroksni batainairok Final bataimwngo phaiywi kasokphaikha. I Final bataimwngo 1st Position ongkha Ramthakur Collegeni Debra Japani Halam, 2nd Position ongkha Khowai i Dasarath Deb Memorial Collegeni Lisha Debbarma aro 3rd Position ongkha Maharaja Bir Bikram Collegeni Bijoy Hari Jamatia. Bataiywi kaplai ongjakrokno borombalai aro trophy tisagwi rojakkha. Bokno borombalai aro trophy tisagwi rokha hasteni Tiprasa hamkrai montri Bikash Debbarma.
Bokni badebo I 'Speech Competition'ni Finalgo bataiphaijak khorokbano borombalai yapharjakkha. Bok ongkha Teliamura Degree College, Longtrai Valley Degree College, Kamalpur Degree College aro Dharmanagar Degree College.
No comments