Drugsno Kasona Bagoi Gondatwisa SDM bai PSni Daiyo TSBni Deputation

5 October 2023, Gondatwisa: hastego phekjaknai mandwi ebakhlai drugs chalaimani aro phallaimani salni slai sal bangrwk-bangrwk. Ibobai haste...

5 October 2023, Gondatwisa: hastego phekjaknai mandwi ebakhlai drugs chalaimani aro phallaimani salni slai sal bangrwk-bangrwk. Ibobai hasteni sikla-chaklirokni thinang barino mwnakni phaichingo yapri barokjak. Kabangma sikla-chaklirok drugs bai langma chokha. Ibo simingya, pora-lekhank khibiyei drugs chamani bai thwimrumru ongjak, brosajak. 

Haste hapang 'Nesha Mukta Tripura' snamnani emangno sabaiywi khokjak-huijakni bisingtwi drugs phalnairok hasteni sikla-chaklirokni daiyo drugs ebakhlai phekjaknai mandwi-khundwirok kasokrogoi tongwk.

Haste gnangoi drugs phallaimani aro chalaimanino kosol tabok Gondatwisa Sub-division daiyobo drugs phallaimani aro chalaimani salni slai sal bangsai tongwk. I Gondatwisa amchaiyo drugs phalmanino mwthaknani aro chanairokno kasonani bagoi krak yapri segwi lamago akhoka Tripura Swrwngnai Buthu. 

Tini Tripura Swrwngnai Buthu, Gondatwisa Divisional Committee aro Gondatwisa College Committeeni bwkhaktwi Gondatwisani SDM Arindam Das, TCSni daiyo kaisa deputation rolaikha. Gondatwisa amchaiyo drugs phallaimani aro chalaimanino mwthaknani aro kasonani bagoi hapangno krak yapri senani bagoi kangsa memorandum balaibo yapharjakkha. 

Drugsno kasonani bagoi Tripura Swrwngnai Buthuni ibotwi jati krak yapri semano nugwi SDM barikhlai khatongjakkha aro khaphurjakkha. Tripura Swrwngnai Buthuni adongrok bai i drugsno kasonani bagoibo kokmalama salaijakkha aro ibono hapangni phaichingtwi krak yapri segwi nainani bagoibo kok rokha.

SDM bai i malaimwng daiyo Tripura Swrwngnai Buthu, Gondatwisa Divisional Committeeni ongoi Kharanjoy Tripura, Sarup Tripura, Karnaram Tripura, Joy Kumar Tripura, Hartanjoy Tripura, Khajendra Tripura, Dalindra Tripura, Kalamjoy Tripura, Dhanaram Tripura, Dhalenjoy Tripura, Rupa Mohan Tripura song thangoi majakkha.

Iboni loge loge Gondatwisa Police Station daiyobo memorandum balai yapharjakkha. Iro Kharanjoy Tripura, Sarup Tripura song thangoi majakkha.