Drugsno Kasona Bagoi Raishyabari PS-go Memorandum Yapharka TSB

05 October 2023, Raishyabari:  hastego tabok salni slai sal drugs phalnai aro drugs chanai bangrwk-bangrwk. Ibobai Tiprasa sikla-chaklirokni...

05 October 2023, Raishyabari: hastego tabok salni slai sal drugs phalnai aro drugs chanai bangrwk-bangrwk. Ibobai Tiprasa sikla-chaklirokni langma mwnakni arobo mwnago klwkjak. Tiprasa sikla-chaklirokno drugs chamani kasonani bagoi amchaini okra-chakra, sijak-nujak lukurok baskango yapri seni nangwk.

Tabok hastego drugs phalmani aro chamanino kasonani aro mwthaknani bagoi khorang tisagwi lamago akhoka Tripura Swrwngnai Buthu. 

Tini Dhalai hangkorni Raishyabari amchaiyo drugs phalma aro drugs chamanino kasonani bagoi Policeni bisingtwi krak yapri sedi aro naikoldi hinoi Tripura Swrwngnai Buthu, Gondatwisa Divisional Committeeni kaisa bodol Raishyabari Police Stationni O/C bai malaikha aro O/Cni daiyo kangsa memorandum balaibo yapharjakkha.

I memorandum balai yapharlaiphugo TSBni ongoi thangoi majakkha Gangajoy Tripura, Charanjoy Tripura, Bithika Tripura, Sunali Tripura, Purnima Tripura song.

Bokno logi rogoi chubaphaika Tripura Chubalai Buthu, Gondatwisa Moyalni tangphang Nabajyoti Tripura aro TSB-ni samung tangoi phaijak kacham adong Mg. Rasnajoy Tripura. 

Drugsno kasonani bagoi TSBni phaichingtwi ibotwi haiklai memorandum yaphalmano Raishyabari Police Stationni khaphurjakmani bisingtwi saka, chwng police mamang chorok samwngno phariya, nohkni chubachu aro amchaini lukurokni chubachubo nango hinoi.