1 August 2023, Kuala Lumpur: thangnai 30 July 2023, Malaysiani Kuala Lumpur daiyo songchajak ALOHA International Competition daiyo Tripura h...
Lucianna Tripurani tongthwi nok Tripura hasteni South Tripura Districtni Maira amchaini Senchandra Parago. Bo tabok Sabroom bwkhakni Sindukpathar amchaini St. Francis De Sales High School daiyo Class-II o poreywi tongwk. Bopha aro bomani bwmwng ongkha Samir Tripura bai Eva Basumatary Tripura.
Lucianna Tripura ALOHA haiyong beremni bataimwngo thangoi bataikha. Bataiywi Grand Champion ongoi medol aro trophy twbwiywi Bharat hagara aro Tripura hasteni bwmwngno kwchwng khlaika. Ibo simingya, bo Tripura Dopha aro chorok Tiprasani mwkhangnobo kwchwng khlaika. Ibo barikhlai khatongtong ongjaknai koktma chini bagoi.
ALOHA haiyong beremni bataimwng daiyo haiyongni kaibrwichi hagarani batainairok thangoi majakkha. Iro Bharat hagarani ongoi khorok thamchibrwi (34) batainairok thangoi majakkha. Iboni bisingo khorokchi (10) batainairok ongkha Tripura hasteni. I khorokchi batainairokni bisingo Grand Champion ongkha khorokdok. Grand Championni bisingo Lucianna Tripurabo khorokcha. Champion ongkha khorokcha, 1st Runner-up ongkha khoroknoi aro 3rd Runner-up ongkha khorokcha. Satai klaiywk, i bataimwngo kisabo koro-kuthu krwikhlai kokphirokmwng ronairokno Grand Champion hinoi saklaijagwk. Thaisa thaichu swngmwngni kokphirokmwng romayarokno Champion hinoi saklaijagwk. I bataimwngo Lucianna Tripura thaisabo koro-kuthu ongyagwi chorok swngmwngni kokphirokmwng rogoi manmani bagoi Grand Champion ongkha. Kaplai ongnairokno medol aro trophy yapharjakkha.
Tripura dophani bagoi aro kaisa khatongjaknai koktma ongkha Lucianna Tripura bana Grand Champion siming bai thagwi tongliya. Bo Tripura dophani huk bai krwngjak hukumuno haiyongni daiyo pirthanigo khachoksa ongoi sinimwng makha. Bo sakni hukumu aro sinimwng Rinai Risa kangoi chumgwi maswmwngno maswgwi phunuka i haiyong beremni bataimwng panago. Bo "Maising-Sachlang" kokthai kholjak rachapkrwngno masagwi phunuka. I maswmwngni bagoi bo kothe khlai borombalaibo yapharjakkha. Bharat hagarani ongoi masamwng masagwi sakni hukumu mukumuno phunuthanigo khoroknoi sep makha. Khorokcha ongkha Bangloreni aro khorokcha ongkha Tripura hasteni Lucianna Tripura.
Lucianna Tripurani ibotwikhlai pharimani aro rwngmani bisingtwi dophani sinimwng hani sinimwngno haiyongni daiyo kasokromani bagoi bono barikhlai khagam aro hamjakma yaphargo. Bini thinang kwchwng ongthwk. Arobo pharithwk.
No comments