5 July 2023, Agartala: miya 4 July bobagra Pradyot Kishore Manikyani achaima sal. I salno ‘Thansa Sal’ hinoi haste gnangoi Tipra Mothani pha...
5 July 2023, Agartala: miya 4 July bobagra Pradyot Kishore Manikyani achaima sal. I salno ‘Thansa Sal’ hinoi haste gnangoi Tipra Mothani phaichingtwi hohom-dodomni bisingtwi palaijakkha. I sal rwgwi TISFni bwkhaktwi Drugs Awarness Program khlaijakkha Agartalani Rabindra Bhawan Hallgo. Drugs Awarness Program rwgwi kaisa rachap-mwsani hukumu panabo songchajakkha. Iro phai majakkha Indian Idolge thangjak Arunachal Pradeshni rachapkrwng Ritu Riba. Biswanath Debbarma, Parmita Reang, Manik Debbarma, Swargashree Debbarma, Rumi Murasingno kosol hasteni rachapkrwngrokbo I panago thangoi rachapthangka.
Miya bobagrani achaima sal rwgwi bono hamjakma rogoi khakchangma rogoi bor ronairokno social mediago live phaiywi hambai yapharka bobagra sakbaithang.
Bo saka, ang aro politics khlaini muchuliya, mator Tiprasarokni hamkraini bagoi jemansak khlailangnai. Twmwi hinba, montri, MP ongoi mwngsa maglak. Katal bodol snamgoibo mwngsa maglak. Jeswk jora Tiprasarok khorang baksa khlai Delhigo kok saya hinklai.
Bo arobo saka, Tiprasarokni bagoi kabangma borok langma rolangjak. Mator hodani bisingo jotoni slai jwngjal gara ongkha kaisa arokaisani gam naimiya ongmani. Aini bagoi tini Tiprasarokni ibotwi jwngjal. Aini bagoi Tiprasarokni hamkraini bagoi bimwngrokno lagwi phainai nokha talnoi-taltham sakni ualai-soklaino plaugwi thainchakhlai Tiprasani chobani khorangno hapangni daiyo kasokroni nangnai. Ibo kerongkokchapnok bisingobo aro phatarobo. Greater Tipraland bimwng mayaswk jora khorang tisani nangnai!
Bobagra ibobo saka, phainai 8 July salmarigo Jiraniani Madhabarigo Tipra Mothani kaisa luku kuthungmwng pana songchajaknai. O luku kuthungmwngo bo sakbaithang thangoi majaknai. I lukukuthungmwng daiyo chorok Tiprasarokno phaiywi majakni bagoibo lukurokno haido khlaika.
Bobagra ibobo saka, phainai 15-16 July salmarigo kuthunglaimwng tongwk. O kuthunglaimwngo bodolni bisingo katal khlai slaijaknai. Boknobo bodolni achokthaigo larwkjaknai je borok bodolni kokno iswk uansokyagwi Tiprasarokni bagoi uanasogoi samwng khlaini naiywk. Mator kebo kebo saka Tipra Mothano arobo krak khlaini nangnai. Bobagra saka, bodolnoya, khorang tisagoi choba khlaimanose arobo krak khlaini nangwk ! tmwi hinba khorokcha khoroknoino achokthai rogoi bodol rakya, bodol aiphugono raknai jephugo dophani lukurok thaincha ongmanai.
Bobagra ibobo saka, thangnai salnoi-saltam sakango (1 July) Tipra Mothani ojamarok Delhigo thangoi Home Minister Amit Shah bai malaiywi Constitutional Solution, Greater Tipraland bimwng aro interlocutorno lagwi nangmani kokmalama salaijakkha hinoi.
Satai klaiywk, phainai 7 July salmarini siming Tripura Legislative Assemblygo Session budget session achokjaknai. Iboni bisingo phainai 8 July salmarigo Madhabbarigo Tipra Mothani lukukuthungmwng pana Tipra Mothani bagoi jeswk nangmani, iswkno Tripura hapangnibo krak naimwthangni bisingtwi mokokaichomjaknai haiklai matongwk.
No comments