10 July 2023, Khumulwng: uanamasangsa khlai achokthai yakakha Tipra Mothani MDC Sadagar Kalai. Iboni lagwi lukurokni khago swngmwng, uansokm...
2021 bisigo Tipra Motha bobagra Pradyot Kishore Manikyani twidulmwng bai ‘Greater Tipraland bimwngni khorangbai poila chongbarigo bataiywi TTAADCni hapango phran phaiywk aro hapango achogwk. TTAADCni chongbarigo 28 seatni bisingo 18 seat manoi kaplai ongwk. Aiphugo TTAADC amchaiyo chorok lukurokni daiyo kaisano khorang thaincha aro Greater Tipraland.
Mator bisinoini olo Tipra Mothani bisingo tma jwngjal ongkha je Tipra Mothani lukuadongrok kaisa paikhlai kaisa bokni achokthai yakanani nangkhna? Bari uanamasangcha onglaijak thainchano hamjagoi, bobagrano hamjagoi salo-horo thuya-chaiya khlai klwngtwi-ksa khiklai chongbarigo vote rogoi Tipra Mothano kaplai khlai honai tongkosong lukurok.
Thangnai 17 May 2023 salmarigo 27-Purba Muharipur-Buratali ADC achokthaini Tipra Mothani MDC Debajit Tripura TTAADC South Zoneni Zonal Develeopment Committeeni achokphangni achokthai yakamani olo tini uanamasangcha khlai Tipra Mothani aro khorokcha MDC machang Sadagar Kalai bobo yakakha Amarpur Sub-Divisionni ADC Land Allotment Committeeni achokphangni achokthai.
MDC Sadagar Kalai bo tini achamitini TTAADCni Chief Executive Member machang Purna Chandra Jamatiani daiyo kokton suiywi bo Amarpur Sub-Divisionni ADC Land Allotment Committeeni achokphangni achokthai yakagwi rogwk.
Bo I achokthai yakamani daiyo suika, “I am herewith tendering my resignation from the Chairmanship post of Land Allotment Committee, ADC of Amarpur Subdivision from today onwards due to some administrative functional problems. I am taking this decision from my own self. So, my humble request you to grant my letter and mark with immediate effect”.
MDC Sadagar Kalai bini I achokphangni achokthai yakamani kokton balaino social mediago post khlaiywi chorok lukurokno saka.
Bo I kokton balaino TTADDCni Chief Executive Officer, TTAADC-ni Land Ravenue and Settlement bedekni Executive Member aro TTAADC Administrative Reforms Committeeni daiyobo copy ephamani kokno khurchajak.
Satai klaiywk, bo I achokthai yakanani sakangobo ibono nukha, thangnai 4 July salmarigo bobagra Pradyot Kishore Manikyani achaima sal rwgwi TISF bodol Agartalani Rabindra Bhawango drugs awareness programme songchalaiywk, ejang MDC Sadagar Kalaikhlai social mediago lahar kasonani kokno post khlai tongwk. Ibo simingya, bo aro kabangma post khlaika, je postrok bo Tipra Mothani khorokcha MDC ongoibo lukurokni daiyo uanalaijak khlainaijati postrok.
Bo I achokthai yakamani kokton blaino lagwi social mediago aro kabangma koktma auainairok jani je chatwi koktma auaimani nugoi MDC Sadagar social mediago kaisa swngmwng tisagoi post khlaikha--
“What nonsense is this?
Land Allotment Committee ni resign rimale tamo asuk big breaking news wngkha ba?
Bubagra se CEM,EM resign rinai hinoi sawoi tongu hinkey ba angle LAC ni chairman si hinkey ba dopha ni saarthe rikha ta! Tabook baad baki rok bu practical o phaitung!
Bason bai simiya…..
Ang kok kom sawo direct action si khwlaiyu!
Ano hamya comment rinai rok, Norokni mind/ wansokmung si negative!
I want Tipraland/Greater Tipraland…..”.
MDC Sadagar Kalai bini statement romani ologobo tabok ibotwikhlai bo I achokphangni achokthai yakamanino lagwi lukurokni daiyo kabangma swngmwng achaijak. Tipra Mothani khorokcha MDC ongoibo tmwi achaimitini I committeeni achokphangni achokthai yakani nangkha? Iboni ulugo tma huijak pher tongoi man? Bodolgo de kha koilaimani klaikhna ?
No comments