13 July 2023, Agartala: Tripura hasteni Reang ebakhlai Bru Dophani amani kok ongkha Kaubru. Kokborok bokni amani kokya. Ibo bokni bimwng. K...
13 July 2023, Agartala: Tripura hasteni Reang ebakhlai Bru Dophani amani kok ongkha Kaubru. Kokborok bokni amani kokya. Ibo bokni bimwng.
Kaubruno Kokborokni kaisa dialect hinoi Brurokni sakago phranbai-kobai khlai rojakphabo Brurok Kokborokno bokni amani kok hinoi khakaiya. Aini bagoi hasteni Reang ebakhlai Bru Dophani lukurok hasteni kothe kok hinoi gosemwng biywi jora kalokma sakangni jiming khorang tisagoi phaika.
Kokborok chini amani kokya, Kaubruse chini amani kok hinoi Reang ebakhlai Bru Dophani lukurok Kaubruno gosemwng biywi kabangma jora rwngoi choba khlai phailaimani nujakkha. Tripura hasteni hastepha, montriokra, Tipra Hamkrai bedekni montri, dagephangni daiyo kothe kothe jorago memorandum balairok ephajakkha Kaubru sanairokni kothe kothe mothani phaichingtwi. Ibo simingya, laithangjak salrogo Kaubruno gosemwng biywi Barot hagarani Human Resource Affairs bedekni montrini daiyobo memorandum blai ephajakkha.
Tabok Kaubruni bimwng bana lamago siming khorang tisajagoi bathagoi tongliya, memorandum balai siming ephagwi bathagoi tongliya, tabok arouaisa Kaubruni bimwng Tripura Legislative Assemblyni Housegobo khorang tisajakkha. 2022 bisigo macham MLA Dhananjoy Tripura poila Kaubru aro Tripura kokni hamkrai biywi khorang tisagwk.
Thangnai 7 July 2023 salmarigo 13th Assemblyni 2nd Session chengjagwk. 7th, 10th, 12th aro 13th July. Tini Sessionni paithak sal. Paithak salgono Tripura hasteni rwngnokrogo Bru Dophani srwngnairokni gamni bagoi Kaubruno phrwngnani Reference Notice twbwikha hapang BJP Bodolni MLA Pramod Reang. Bo tisaka--
"ত্রিপুরা সরকারি বিদ্যালয়গুলোতে " ব্রু" à¦াষাà¦াষী ছাত্রছাত্রীদের সুবিধার্থে "ব্রু" à¦াষায় পাঠ্যক্রম চালু করার প্রয়োজনীয়তা সম্পর্কে।"
MLA Pramod Reang bai tisajak Reference Noticeni phirokmwng rwgwi rwngbedekni montrini barja majak ebakhlai montriokra Prof. (Dr.) Manik Saha saka—
Tripura hasteni rwngnokrogo Kokborok aro kaisni gira gira kok- Chakma, Halam, Mog, Garo, Kuki-Mizo, Manipuri, Bishnupriya Manipuri kaisa subject khlai phrwngjagoi tongwk. I kokrokni textbook rwngremsani siming rwngremchar jora hasteni SCERT bai snamjagoi tongwk. Ibo badebo rwngremchukuni siming rwngremchisa jora Kokborok Tei Kubun Borok Bangthaya Dagekhongni siming sapaiywi bijap bakjagwk. Kokborok kokbai koksanai kaichuku dopha tongwk- Debbarma, Reang, Jamatia, Tripura, Murasing, Rupini, Uchai, Noatia aro Uchai. O dagephangni phaichingtwi Kokborokni kaichar kokni kothe kothe kokbedekni kokthai rwgwi Thesaurus bijap karejakkha. Iro Kokborokni kokbedekrokno kokthai pherlaima rwgwi tisagoi phunujakkha. Sakago khurchajak chorok dophani kok Kokborok hinoi sinijakmani bai Kaubruno Tripura hapangni rwngnokrogo kaisa subject hinoi phrwngnani bagoi uansokma daiyo twbwijakyakho.
Satai klaiywk, Kaubruno kothekhlai gosemwngni bimwngno naikolni bagoi aro rwngnogo kothe subject khlai phrwngjaknani bagoi bimwng tisajakmanirokno jai-jaikhlai naikolnani bagoi hasteni rwngbedekni phaichingtwi kaisa committee khajakkha. I Committee tabokbo Kaubruno lagwi mwngsabo kokchaplaimani krwikho, aini bagoi iboni reportbo yapharjakyakho. Hasteni kaichichuku ST rok tongwk, arobo sub-tribe tongwk, chwng naiywk bokni chorokni kok-hukumuno hamkrai khlainani hinoi.
Iboni olo Reference Notice tisanai MLA Pramod Reang bo montriokrani kokno lamjogoi saka, Tripura hastego kaichichuku ST rok tongphabo tmwi chwng Kaubruni bimwng tisaka? Kokborok bai kaubruni bisingo pherlaimwng tongwk. Kaubru ongkha bana PTG bedego tongnai Brurok simingse sagw, ibono Reangkokbo hinlaiywk. Kokborok sanairok ongkha Debbarma, Jamatia, Noatia, Murasing, Tripura, Rupini, Kalai. Chwng Reang, chini kothe dialogue tongwk. Debbarma ebakhlai Kokborok bai chini dialogue solaimani tongwk mator kabangmano pherlaimanibo tongwk. Romdi- bai ‘anaroso’, ibono Reangrok sago ‘omtwi’. ‘Dada’, ibono chwng ‘ata’ hino. Ibotwikhlai kabangma pherlaimani tongwk. Chwng je phran khlai Kokborokno sani nangnai ibotwiya, chwng chorokno Kokborokno sagwk, chwng Kokborokno kebengya. Mator noiberemni borokkabang dopha ongoi chwngbo naiywk gira gira dophani kok gosemwng mago hinkai chini tmwi maya? Aini bagoi chini bimwng ibono Kaubruno gosemwng roni ongthwk.
Pramod Reang ibobo saka, Hindi, Urdu, Bangla, Assamese sollaimani tongtwi chini Kokborok bai Kaubruni bisingo sollaimani tongwk. Chwng Town amchaiyo tongwk, chwng Debbarmarokbai baksa tongwk hinoi Kokborokno samagwk mator kabangma tongwk Kokborokno sagwimaya. Bo ibobo saka, sebok daiyobo Kokborok bai Bangla jeba kaisa manani nangnai. Mator Chakma, Kaipeng, Halam bokto Kokborok maya boknikhlai tma ongnai? Boklai sebokse maglak! Iborokbo nainani nangnwk. Aini bagoi bo Kaubruno hasteni rwngnogo phrwngnani bagoi yapri senani khabai haiyokkha.
Iboni olo montriokra Prof. (Dr.) Manik Saha arouaisa saka, ani daiyo Tripura hapangni Under Secretary 14 March 2022 bisigo Committee khajakmani kokthum tongwk. Chwng habasarokni hukumu-mukumu, kok gamkrwngkhlai tongmanthwk ibono jonom naiywk chini hapang, ibo chorokno siywk. Bo iro je kokbomano tisaka, committeeni report sopaigrathwk, nangkhlai bokno arouaisa ringkhonai, bobo hai statusgo tong. Iboni olo sakojaknai.
Iboni olo hasteni kebengnai bodolni ojama Animesh Debbarma, bo Kaubruno hasteni rwngnokrogo phrwngnani bagoi tisajak Reference Noticeno kebengoi kok saka aro Kaubruno kothe khlai gosemwng rona thangtanigo jai-jaikhlai naikoljakni ongthwk hinoi hapangni daiyo haiyokkha. Bo Bangla kogo kokbedek rwgwi pherlaimanino khurchagwibo kok saka. Jesa dophani kokno kothe kok hinoi gosemwng roni thangtanigo bini tongthaiha boro, haste boro, achaimani yaphang-yarwng boro iborok sopainai. Tongthai ha, hasteni bade kok ongmiya. Aini bagoi I kokbomano klaisa khlai uansokyagwi krak khlai naijaknani nangnai, hapang achaimiti I samwngno lagwi yapri seyakhlaino gam ongwk.
Iboni olo montriokra Prof. (Dr.) Manik Saha paithago arouaisa saka, iro kabangma kok kasaka, Kaubru hinoi bok bimwng tisakha, committeebo ongkha. Bok Kaubruse naiywk hinoi bimwng tisaka, chini iro Manipuribo tongwk, Chakmabo tongwk, hinkai bokni Kaubru khlai tma jwngjal? Jani jani bimwng sopaikha, o bimwngni gothemwngde tong ibono chwng amjogoi nainai, committeeno ringnai, koksalainai.
Khurchathai klaiywk, Kaubru bai Tripura kokni hamkrai biywi Language Development Committee khanani bagoi thangnai 23 March 2022 bisigo Tripura Legislative Assemblyni Sessiongo poila swngmwng tisagoi kokmalama salaika IPFT bodolni kacham MLA Dhananjoy Tripura. Kacham MLA Dhananjoy Tripura tisamani olo tini Kaubruno lagwi Assembly Housego arouaisa tisaka BJP bodolni MLA Pramod Reang.
No comments