Kokborokni Script Selection Committee Tripura Gazettego Karejakkha

20 July 2023, Agartala:  Kokborokni bagoi bobo Scriptno hapang gosemwng rono ibo tabokbo sraichayakho. Iboni bisingose uaisa Bengali Script,...

20 July 2023, Agartala: Kokborokni bagoi bobo Scriptno hapang gosemwng rono ibo tabokbo sraichayakho. Iboni bisingose uaisa Bengali Script, uaisa Roman Script, uaisa Devanagari Scriptni bimwng tisagwi Kokborok sanairok khorokcha bai aro khorokcha kok mililaiyamang.

Aiphabo Kokborok sanai kabangkuk lukurok Roman Scriptno chajagwk aro Roman Script bai suilaywk, kokrabailaiywk. Mator haste hapang tabokbo Roman Scriptno Kokborokni Script hinoi gosemwng royakho! Ibono lagwi tabok Tripura haste gnangoi barikhlai jwngjal. 

Kokborokni Script jwngjalno paironani bagoi jabwiyo Tripura hapang uainoi Bhasha Commission, uaisa Script Selection Committee khaka aro TTAADC hapang uaisa Resolution pass khlaika, ibono amendmentbo khlaika. Aiphabo Scriptni jwngjal paimaliya !

Aini bagoi thangnai 27 June 2023 salmarigo Tripura hapangni Tribal Welfare Departmentni Tribal Research and Cultural Instituteni siming Kokborokni Script jwngjalno naikolnani bagoi arouaisa 'Script Selection Committee for Development of Kokborok Language' khajagwk.

Tribal Welfare Departmentni Tribal Research and Cultural Instituteni siming habanokni Siming F.No.4(24)/TRI/BHASHA COM/2020/821-33, Dated, 27th June, 2023 notification balai karegoi saklaijak i 'Script Selection Committee for Development of Kokborok Language' committeeni Convener snamjakkha kacham MLA Dr. Atul Debbarma. Biralal Tripura bai Dhirendra Kalaino i Committeeni adong snamjakkha.

I notification balai Tripura Gazette daiyobo karejakkha thangnai 10 July 2023. Gazette No. 961.