TTAADC-ni Kokborok Bedekni Katal Bwmwng 'Kokborok & Other Indigenous Languages Department'

20 July 2023, Khumulwng:  TTAADC-ni Kokborok Bedekni bwmwng salaijakkha, katal bwmwng larwkjakkha 'Kokborok & Other Indigenous Langu...

20 July 2023, Khumulwng: TTAADC-ni Kokborok Bedekni bwmwng salaijakkha, katal bwmwng larwkjakkha 'Kokborok & Other Indigenous Languages Department'.

Thangnai 16 June 2023 salmarigo TTAADCni 15th Executive Committeeni 14th Meeting songchajagwk. I meeting ebakhlai kokmalama pana daiyobo kokchapjakkha TTAADCni Kokborok Libraryni bwmwng bai Kokborok Departmentni bwmwngno slainani kokchapjakkha. Kokchapjakmanitwi TTAADCni Kokborok Libraryni katal bwmwng ongkha 'TTAADC CENTRAL LIBRARY KHUMULWNG' aro Kokborok Departmentni katal bwmwng ongkha 'KOKBOROK AND OTHER INDIGENOUS LANGUAGES DEPARTMENT'.

Thangnai 27 June 2023 salmarigo TTAADCni hapangni Kokborok Departmentni Principal Officer habanokni siming F.No.20(10-18)/ADC/KD/21/723-69, Dated, Khumulwng, the 27/06/2023 notification balaini bisingtwi i kainoi katal bwmwngno saklaijagwk.

Satai klaiywk, thangnai bisi kalokma rwngoi TTAADC-ni Education Departmentni siming 'Language Wing' bwmwngoi kaisa bedek bupra tongwk. I Language Wing buprani siming Kokborok, Chakma, Mog, Garo, Halam, Molsom, Karbong kokni hamkraini bagoi samwng tangjagoi phaiywk. Kok aro kokrabaini hamkraini bagoi samwng tangnani bagoi kothe khlai Kokborok Department snamnani bagoi bimwng tisajgoi phaijak mator thangnai yaksibodol hapangni jorago kothe khlai Kokborok Department snamjakliya. Paithango thangnai 2021 bisigo Tipra Motha hapang phaimani olo TTAADC-go kothe khlai Kokborok Department snam rokha. Iboni olo Kokborok kokni logego aro gira gira dophani kokni hamkraini kokno uansogoi TTAADC hapangni i kokchapmwng.

I notification balai thangnai 10 July 2023 salmarigo Tripura Gazettego karejakkha. Tripura Gazettee No. 962.