7 July 2023, Agartala: Assembly Hall bisingo BJP bodolni MLA Jadhab Lal Nath hamya video naimanino lagwi tongphlaikha Tripura Assembly Sess...
7 July 2023, Agartala: Assembly Hall bisingo BJP bodolni MLA Jadhab Lal Nath hamya video naimanino lagwi tongphlaikha Tripura Assembly Sessiongo. Ibono lagwi Speaker Biswa Bandhu Sen khorokba kebengnai bodolni MLAno tini salchani bagoi Assembly Houseni suspend khlaika aro kebengnai bodolni chorok MLA Assembly Houseni walkout khlaika.
Satai klaiywk, thangnai Assembly Sessiongo BJP MLA Jadhab Lal Nath Assembly Session cholephugo kathar Assembly Hallgo achok-achogoi hamya video nai tongmani kaisa video clip social mediago barikhlai viral ongkha. Ibono lagwi hasteni chorok political bodolrok khorang tisalaikha. Bono MLA achokthaini konoronani aro bo achogoi hamya video naimani achokthainobo Gonga Twimani twibai suchagoi kathar khlaini bagoibo bimwng tisaka kebengnai bodolni ojama Animesh Debbarma. Mator Jadhab Lal Nathni o selengmasangcha patimwngno lagwi Tripura Legislative Assemblyni Speaker machang Biswa Bandhu Sen taboksak jora mwngsa krak yapri semani krwi!
Tini 13th Assemblyni 2nd Session songchajagwk. Session songchajagoi budget saklainani sakango hasteni kebengnai bodoloni ojama Animesh Debbarma BJP MLA Jadhab Lal Nathni patimwngno lagwi tmwi krak yapri sejakya hinoi kok tisagwk. Mator Speaker I patimwngno lagwi mwngsa kok sanani naiya, 2023-24 rangbisini budget saklaini bagoi rangmontri Pranajit Singha Royni bwmwng khugwk. Rang montribo bwchagoi budget saklaini chengwk. I joragono kebengnai bodol Tipra Motha, CPI(M), Congressni chorok MLArok bwchagwi khorang tisalaiywk. 11:00 AMni siming 12:00 PM jora iboni krak yapri semwngni kokphirokmwng biywi khorang tisaka.
Iboni bisingo Tipra Mothani MLA Brishaketu Debbarma, MLA Ranjit Tripura, MLA Nandita Reang Debbarma, Congress bodolni MLA Sudip Roy Barman aro CPI(M) bodolni MLA Nayan Sarkarno Speaker tini salchani bagoi Assembly Houseni suspension khlai rogwk. Iboni olo bokno uaire-uai House bisingni akhogoi thangnai bagoi saklaiywk Speaker. Bok baksaba Speaker achokmani tolani table sakago kakha baksaba tableno yakbai bupralaikha. Aini bagoi bokno suspend khlaijakkha.
Mator suspend ongjak khorokba MLArok Hallni akhonani soiya. Paithago watch & wardni bisingtwikhlai bok khorokba MLAno Assembly Houseni tikhlaika. Iboni logego MLA Gopal Royni bade kebengnai bodolni chorok MLArokbo Houseni walkout khlailaikha. Ibohaiklai kebengnai bodolni MLArok jesa jwngjalno twiwi koksanani, swngnani, khorang tisanani raidano bukhuk muthuni naimano aro suspend khlaimano lagwi Assemblyni kerong raida rwgwi rangsa swngmwng tisaka aro kok saka. Olo bobo Houseni walkout khlaiywk.
Iboni olo Speaker rangmontrino arouaisa 2023-24 rangbisini budget saklaini bagoi saklaiywk. Rangmontri Pranajit Singha Roy budget saklaiywi pairogwk.
I khorokba MLA-no suspend khlaimani Assembly Houseni patimwngno lagwi Tipra Mothani kasku bobagra Pradyot Kishore Manikya reaction rokha--
"It is unfortunate that the Hon’ble Speaker of the Tripura Legislative Assembly didn’t take any cognisance, let alone take action on the MLA Jadab Lal Nath, who was caught watching obscene content (porn) in the assembly (during the last session), but instead suspended 5 opposition MLAs (3 TIPRA Motha MLAs) who were demanding due action on the concerned MLA.
If the government and the speaker is so much concerned about upholding the sanity and dignity of the house, then they must take prompt action against the MLA who brought shame to the whole state by his heinous act inside the temple of democracy".
No comments