Hasteni Janajati Morchano Krak Khlaini Bagoi BJPni Kuthungmwng

4 July 2023, Agartala: baskangni Lok Sabhani chongbarino naikhogoi habasarokno bodolgo krak khlai tisani bagoi lamago akhoka BJP bodol. Bodolni Central Committeeni adongrokno tabok thu-cha krwikhlai lamago akholaini chengkha. Miya Agartalago BJP Tripura Pradesh habanogo  Janajati Morchani National President ebakhlai MP Samir Oraon, kacham montriokra Jishnu Devvarma, BJP Tripura Pradesh President Rajib Bhattacharyani manjakmwng bai BJP Janajati Morchani ojamarok bai kangsa kokchaplaima pana songchajakkha.

I kokchaplaima panago phainai Lok Sabhani chongbari, Dhanpur Assembly chongbari achokthaini repoll, Village Committeeni chongbarini kokno lagwi kokmalama salaijakkha aro kokchaplaijakkha. Chorok chongbari daiyo batainani bagoi sakangbariya hapang bodol krak khlai jugaloi tongsoknani naiywk. Ibobadebo hasteni chorok boothno arobo krak khlai tisani bagoi yapri senani, habasarokni amchaiyo BJP bodol krak khlai achokthai snamni bagoibo kokmalama panago koksalaijakkha.

Miyani i kuthungmwngo montri Bikash Debbarma, montri Santana Chakma, MLA Rampada Jamatia, BJP Pradesh Vice-President Uttara Debbarma, Patal Kanya Jamatia, BJP bodolni MLA, MDC song phaiywi majakkha.

BJP Janajati Morchani National President ebakhlai MP Samir Oraon hasteni Janajati Morchano krak khlai tisani bagoi hasteni montriokra Prof. (Dr.) Manik Saha bai malaiywi kokmalama salaika. 

Machang Oraon thangnai Tripura Legislative Assemblyni chongbarigobo hasteni Vice Prabhari ongoi samwng tanglangjak. Dolini siming hachwk jorago bo thangoi beraijak aro bodolno krak khlaini bagoi chaitoklangjak. Tabok BJP Central aro Pradesh committee phainai chongbarini bagoi bono samwngo phnangnani naidok. Aini bagoi sakangbariya hasteni Janajati Morchano krak khlai tisani bagoi BJP Tripura Pradeshni ojamarokni logego bobo akhonani chengkha.