Bobagrani Achaima Salgo Drugs Awarness Pana Rwgwi Sraicha Khlaika, TISF

4 July 2023, Agartala: tini sareni damdok jorago habobagra Pradyot Kishore Manikyani amchaima sal rwgwi Agartalani Rabindra Bhawango songch...

4 July 2023, Agartala: tini sareni damdok jorago habobagra Pradyot Kishore Manikyani amchaima sal rwgwi Agartalani Rabindra Bhawango songchajakni thangoi tongwk sikla-chaklirokno phekjaknai mandwibai langchagoi tongnani bagoi Drugs Awarness pana. I Drugs Awarness rwgwi songchajak hukumu panago phaiywi majaknai Indian Idolgo thangoi phaijak barikhlai sinimwng majak Arunachal Pradeshni rachapkrwng Ritu Riba. Bini badebo hasteni Tiprasa rachapkrwng Biswanath Debbarma, Parmita Reang, Swargashree Debbarma, Rumi Murasingh, aro Manik Debbarma. 

I Drugs Awarness panago thangoi nainani bagoi miya 3 July salmarigo Tipra Indigenous Students’ Federation (TISF)ni phaichingtwi 12:00 PMni siming 6:00 PM jora Rabindra Bhawango free entry pass bakjakkha. I entry pass bakthanigo srwngwi tongnairokno poila priority rojakkha, aini bagoi bok Student Idenitity Card twbwini phainani bagoibo sakangbari saklaijakkha TISFni phaichingtwi. 

I Drugs Awarness panago phaiywi majakni bagoi aro entry passno lagwi miya lukurokno  koktmathungnai panani bisingtwi sraichakhlai sagwi khnarokha Tipra Indigenous Students’ Federation (TISF). 

TISFni ongoi Sajra Debbarma saka, I drugs awareness panago poilago srwngnairokno hapnani sep rojaknai. Oboni bagoi Valid Student Identity Cardni Xerox copy nangnai. Achokthai tongwk 1400. Srwngnairokno achokthai rojakmani olobo arobo achothai bwkcha tongo hinklai arolukuroknobo hallgo dajaknai. Iro Tipra Mothani boma bodol sikla bodolroknobo phaiywi naiphainani bagoi haido khlaijak. I pana sareni damdokni siming chengjaknai. Iro rachapmwng-masamwng aro drugs awarnessno lagwi koklambo salaijaknai. TISFni koktmathungnai panago TISFni Convenor Uttam Tripura aro TISFni ojamarok phaiywi majakkha.