Greater Tipraland, Constitutional Solutionno Lagwi Home Minister bai Malaikha TIPRA Motha

4 July 2023, Agartala: thangnai salnoi-saltam jora rwngoi Tipra Mothano lagwi Tripura hago barikhlai koktma kutung kutung kasajak nugwk. Bo...

4 July 2023, Agartala: thangnai salnoi-saltam jora rwngoi Tipra Mothano lagwi Tripura hago barikhlai koktma kutung kutung kasajak nugwk. Bobagra Pradyot Kishore Manikyani twidulmwng bai Tipra Mothani khorokchi adong Delhigo thangoi Home Minister Amit Shah bai malaimanino lagwi hasteni koktma auainairok jani je pharitwi koktma auailaikha. Mator bobagra aro Tipra Mothani ojamarok twmwi Delhigo thangka I koktma sraicha ongkha. 

Miya 3 July salmarigo Delhigo thangoi hagarani Home Minister Amit Shah bai malaiywi Tripura hastego phirokphugo Maharaja Bir Bikram Airportgo koktmathungnairok bai kokswngjakphu bobagra sraicha khlai saka tmani bagoi Tipra Mothani ojamarok Delhigo thangka. 

Bobagra saka, Constitutional Solution aro Greater Tipraland bimwngno lagwi Tipra Motha Delhigo thangwk. Poilago chini Tiprasarokni hamkraini bagoi mwngsaswk rojadi, iboni olo chwng uansoknai hapango sobo achoknai achokya. Tomwng chini bimwng swplwngjakya hinklai chini bagoi chorok option larwkjak tongwk. Tiprasarokno je kokrojak tongmani, iboni mwngsabo swplwngwi maya hinklai chwng hapango achoglak ! 

Bo arobo saka, chini bimwng Constitutionalni bisingo Greater Tipralandno lagwi Home Minister bai kokmalama salaijakkha. Kokborokni Roman Script ibo chini bimwngono tongwk, ibono Home Ministerbo siywk. Chwng Home Minister bai kokmalama saliphugo Interlocutorno lagwibo kok salaika aro chorokni baskango bo goseka, aiphugo Manipurni jwngjalni bagoi Interlocutorno lagwi chini samwng chengnani kisa lerkha hinoi. Chini kokboma ongkha Constitutional Solution, Greater Tipraland, Tiprasa lukurokni mwthangjaknani lama I bimwngni bade aro mwngsa sanani naiya. 

Bobagra ibobo saka, hapango achogoi ang obotwijati chaiya khlaini naiya, jeno IPFT bodolrok 2018 bisigo hapango achogoi Tiprasarok bai chaiya samwng khlailangkha. Sakni lukurokni bagoi koksayagwi achok achogoi montri chagwi bisibago mwngsabo maliya, ang o chaiya khlaiya. 

Barot hapang Uniform Civil Court twbwini naitongmanino lagwi koktmathungnairok bai swngjakphu bobagra saka, poilago Barot hagara hapangno draft khlainani rogradi iboni olo chwng comment khlainai. Bo ibobo saka, chini Tiprasani Customary law, North-East Indiani habasarokni Customary Law raida tongmani ibonobo gamkhlai boksagwi-chongsagwi, rwngwi larwkni nangnai.

Bobagrani twidulmwng bai Home Minister Amit Shah bai maliphugo Tipra Mothani twiphang Bijoy Kumar Hrangkhawl, TTAADC-ni Chairman Jagadish Debbarma, hasteni Leader of Opposition Animesh Debbarma, TTAADC-ni Chief Executive Member Purna Chandra Jamatia, Executive Member Runiel Debbarma, Executive Member Bhaba Ranjan Reang, MLA Brishaketu Debbarma, MLA Biswajit Kalai song tongbaiywk