INTERLOCUTOR A.K MISHRA BAI MALAIKHA HODA OKRAROK

27 July 2023, New Delhi: MHA Northeast Regionni Advisor ebakhlai Interlocutor Akshay Kumar Mishra bai malaikha Tiprasa Communityni Hoda Okra...

27 July 2023, New Delhi: MHA Northeast Regionni Advisor ebakhlai Interlocutor Akshay Kumar Mishra bai malaikha Tiprasa Communityni Hoda Okrarok. 

Tiprasano mwthangnani, Tiprasani thinang aro Tiprasani hamkraini bagoi Constitutional Solution aro Greater Tipraland bimwngno naikhogoi Tiprasani jwngjalno naikani khlaiywi hagara hapangni daiyo koktunnani bagoi raibai ebakhlai Interlocutor sitongnani khorang tisagoi phaika bobagra. Uaire-uai Tripura hastego Interlocutor phainani salmari saklaiywibo sopailiya. Ibotwikhlai Tiprasani thinangno lagwi hagara hapang sak nangya khlaimanibo nujakkha.

Tiprasano mwthangnani bagoi Constitutional Solution bithanigo bana bobagra aro Tipra Motha simingya, tabok Tiprasani chorok hodarokbo naiywk. Ibo arouaisa sraicha ongoi kasai phaika. 

Tini New Delhigo thangoi MHA Northeast Regionni Advisor ebakhlai Interlocutor Akshay Kumar Mishra bai malaikha Tiprasa Communityni Hoda Okrarok. I malaimwngo Hoda Okrarokni bwkhaktwi kangsa memorandum balaibo yapharjakkha Interlocutor AK Mishrani daiyo.

I malaimwngo Tripura dophani Naran ebakhlai Council of Tiprasa Hodani Convener machang Birendra Tripura, Jamatia Hodani kacham Hoda Okra ebakhlai Council of Tiprasa Hodani Chairman machang Padma Lila Jamatia, Tripur Kshatriya Samajni twiphang Jogendra Debbarma, kacham twiphang Dilip Kumar Debbarma, Murasingh Hodani tangphang machang Sunil Murasingh, Bru dophani Rai Kaskau Parishadni tangphang machang Pancharam Reang, Kalai Samajni Rai machang Mangal Pada Kalai, Molsom Hodani tangphang yakchu Narayan Molsom song thangoi majakkha.

Tiprasa Hodani Hoda Okrarok bai malaiywi memorandum balai yaphargwi kokmalama saimani olo Tiprasani jwngjalno jaijai khlai naikani khlaini kokrokha Interlocutor machang A.K Mishra.