27 July 2023, New Delhi: Tiprasano mwthangnani bagoi Constitutional Solution aro Greater Tipraland bimwng bai thangnai bisinoi jora rwngwi T...
27 July 2023, New Delhi: Tiprasano mwthangnani bagoi Constitutional Solution aro Greater Tipraland bimwng bai thangnai bisinoi jora rwngwi Tipra Mothani bisingtwi khorang tisagoi phaika hani bobagra Pradyot Kishore Manikya. Uaire-uai Delhigo thangoi hagara hapangni ojamarok baibo malaikha. Mator taboksak jora mwngsa manmani krwikho. Aini bagoi hasteni tongkosong tongnai lukurokni daiyo uanama halaijak.
Thangnai 2023 Tripura Legislative Assemblyni chongbarigo bataiywi Tipra Motha hasteni kebengnai bodol gara ongoi makha. Iboni olo Constitutional Solutionni bagoi Barot hagara hapang bai Tiprasani bisingo kok tunnani, kok lanani bagoi raibai ebakhlai Interlocutor chongjaknani kokbo lasai phaika. Mator MHA Northeast Regionni Advisor Akshay Kumar Mishra ebakhlai AK Mishrano Barot hagara hapangni raibai ebakhlai Interlocutor ongoi Tripura hastego uaireuai phainai phainai hinoi salmari saklaiywi naisinglai tonglaibo Interlocutor tabokbo sopailiya.
Iboni bagoi thangnai nokha talbrwi-talba jora rwngoi bobagra Pradyot Kishore Manikya hasteni lukurok bai, kothe kothe political bodol khlainai ojamarok bai, koktma thungnairokbai samwngsiniya swngmwng tisajagwi, koksilchajagwi tongnani nangkha. Ibo simingya, Tipra Mothani kabangma ojamarok Tipra Motha yakagwi BJP bodolgo yapri semani nujakkha.
Paithago tini Barot hagarani Home Minister Amit Shah bai malainani thangoi tongmani koktmano social mediani bisingtwi saklaikha bobagra. Bo saka--
"5 Months of trolling, abuse, insults end today as we "officially" meet the HM officials along with other organisations today. I pray that the almighty give some enlightenment to those who made fun of me in the last few months. Those who called me a liar stand exposed and my commitment for a constitutional solution for holds true. I have suffered immensely but my love for our people remains and so does my commitment".
I gam koktma aro khatongjaknai koktmano numani olo lukurok tabok naisingjak, kwbwi kwbwide Tiprasano mwthangnani bagoi Barot hagara hapang mwngsaswk gam yapri seno hinoi.
Bobagra bai Home Ministerni bisingo i malaimwngo bobagrani loge Tipra Mothani bo bo ojama majakni ibo tabokbo sasokmayakho. Aiphabo huijak koktmani bisingtwi sagwi makha, kaibrwi-kaiba Tiprasa Hodani Hoda okrarokbo bobagrani logego thangwi majaknaiphwk hinoi.
Tabok naisingoi naithai, bobagra bai Home Ministerni bisingo achoklaimani olo Tiprasano mwthangnani bagoi Barot hagara hapang tma yapri seno.
No comments