Hasteni Collegerogo Fee Bangromano Khorang Tisaka TSU-SFI

4 July 2023, Agartala: Jabwiyo Tripura hasteni Collegeogo rangkho-pwicha roni nangya freeno rwng srwngni sep tongwk. Mator takhlai haste hap...

4 July 2023, Agartala: Jabwiyo Tripura hasteni Collegeogo rangkho-pwicha roni nangya freeno rwng srwngni sep tongwk. Mator takhlai haste hapang Collegeni feerok barikhlai bangromani bagoi rwngsrwngnairok fee kabang kabang ronani nangnaikha. Collegeni feerok achamitini barerojakmani bai hachwk-para amchaini tongkosong tongnai, hukbar khlai tangoi chanai nukhungni basarok Collegego porenani bagoi barikhlai jwngjalgo klailaijak.

Ibotwi jorago, tini TSU-SFI kainoi bodol Collegeni fee bareromanino kebengoi jabwini haiklai free khlai Collegego rwngsrwngnani sep khlai rodi hinoi khorang tisagwi Higher Educationni dagephang bai malaiywi deputation rolaini thanglaimani, mator dagephang habanogo krwi ongmanibai kaisabo malaiphailiya bokbai.

Iboni olo TSU-SFI bodol dagephangni room baskango achoklai khorang tisalaimani olo, paithago habanokni khorokcha habaphang TSU-SFI bodol bai malaiywi bokni haidokhlaimwng (application) balaino yachakkha.

Collegeni fee bangromano lagwi khorang tisagwi Higher Educationni dagephang bai malaithanigo tini TSU-SFI bodolno twidulkha TSU Central Committeeni twiphang Netaji Debbarma, tangphang Sujit Tripura, SFI Tripura State Committeni twiphang Suleman Ali, tangphang Sandipan Deb. Bokni logego tongwk TSU-SFIni jaksa rwngsrwngnairok.