Asstt. Teacher Asha Tripura Thwimanino Justice Biywi Khorang Tisaka Chittagong Hill Tracts Writers' Union

28 July 2023, Khagrachari, Bangladesh:  Khagrachari Districtni Matiranga Upazilani Tapta Master Para Govt. Primary Schoolni Asstt. Teacher A...

28 July 2023, Khagrachari, Bangladesh: Khagrachari Districtni Matiranga Upazilani Tapta Master Para Govt. Primary Schoolni Asstt. Teacher Asha Tripura bo basai Udipan Tripura aro basa khoroknoino lagwi Khagrachari dolini Mahajan Parago nokchorai tongoi tongwk. Mator thangnai 21 July salmarigo  Asha Tripura uanamasangsa khlai thwimano lagwi Bangladesh hagnangoi uanalaijak aro kha khamlaijak. I patimwngni justice biywi tabok kabangma bodol khorang tisalaikha. 

Asha Tripurani uanamasangsa khlai thwimanini patimwngno lagwi tini Press Releaseni bisingtwi barikhlai kha khammani kokno saka Bangladeshni 'Chittagong Hill Tracts Writers' Union'. 

Chittagong Hill Tracts Writers' Union' arobo saka, khorokcha phrwngnai ibotwi khlai uanamasangsa aro khakhamchacha khlai thwimani ibo gosegwi lamajaknaiya. Iboni bisingo Asha Tripurani uanamasangsa aro krimasangcha khlai thwimanino lagwi social media, electronic media, print media, hoda-hukumu mothani bisingtwi gamkhlai khorang tisajakkha. Chwng kha khlaiywk ibotwijati butharjakmani patimwng hodago jetwikhlai chaiya-chukyani samwng-homwng bangsamanitwi ibotwino brwirokno sakago chopromani bangsagwi phaiywk. Ibotwi jorago 'Chittagong Hill Tract Writers' Union' phrwngnai Asha Tripurani uanamasangsa aro krimasangcha khlai thwimanino kwbwi justice roni bagoi  naikani khlaiywi patimwng bai krwngjakrokno krak majra ronani bagoi kerong raida manegwi naikolnai aro naimwthang bodolni adongrokni daiyo haiyogo. 

Union kha kagwk, tomwng kerong naikolnai Asha Tripurani uanamasangsa khlai thwimanino lagwi hamkhlai naikolgoi kwbwi justice romiya ongo hinklai hodago ibotwijati patimwng arobo ongmano. Chorok kebeng-kosongno yakagwi Asha Tripurani uanamasangsa khlai thwimanino lagwi gamkhlai naikolgoi patimwng bai krwngjakno krak majra roni ongthwk hinoi bimwng tisaka Chittagong Hill Tracts Writers' Union. 

Unionni ongoi Press Releaseni bisingtwi saklaikha Information & Broadcasting Secretary Jhumalia Chakma.