Asha Tripura Thwimani Justice Biywi Khorang Tisajakkha Rangamatigo

30 July 2023, Rangamati, Bangladesh: Asstt. Teacher Asha Tripura krimasangcha khlai thwimanino justice biywi tini CHT Women Activist Forum aro Progressive, SK Building, Banrupa, Rangamatini thainchakhlai khorang tisalaikha.

Tini phurung damchisa jora atlogo Rangamatini DC Office baskango CHT Women Activist Forum aro brwi ojama Tuku Talukdarni achokphang bai i panago kok sagwi khanarokha National Human Rights Commissionni kacham adong Nirupa Dewan, Rangamati Garjantali Mohila Samitini twiphang Sagarika Roaja, Rangamati Sadar Upazila Parishadni Vice-Chairman Nasrin Islam, Rangamati Public Collegeni Lecturer Mukul Kanti Tripura aro kabangma okra-chakrarok.

Koklarwknairok saka, chwng naimwthangni sakago paitokmwng tongwk. Naimwthang bodol poilani siming gamkhlai nangkhrugwi i patimwngno naikolgoi tongwk. Chwng naimwthangni bisingtwi i patimwngni kwbwi kwbwi koktma sinani naiywk. Asha Tripurani bwsaino naimwthangrok gamkhlai kok swngni ongthwk. Tmwi hinba Asha Tripura thwiphugo bwsai Udipan Tripura simingno nogo tongwk. Aini bagoi bo sinai Asha Tripura bai tma patimwng patikha. 

I patimwng bai krwngjak chorokno kerongraidatwi krak majra ronani aro thwinai Asha Tripurani postmortem report daktwi ronani bagoi hapangno haido khlaika kok larwknairok.

Satai klaiywk, thangnai 21 July hukjakbaklai jorago Asha Tripurani thwiho gnang mangkwthwino Khagrachari dolini Salthang Mahajan Parani nokchoraini twikujaknai thaini siming tisagwi bwsai Udipan Tripura aro nok korekarani borokrok sakgamnogo tlangwk.

Thwinai Asha Tripura bo Matiranga Upazilani Tapta Master Para Primary Government Schoolni Asstt. Teacher. Udipan Tripura bai bisichiba nukhung khamanigo bokni basa khoroknoi tongwk.