TSF-ni Roman Script Bimwng Chobano Lagwi Aidakoktma Auaijakmano Sraicha Khlaika TSF

22 June 2023, Agartala: miya 21 June 2023 salmarigo Twipra Students’ Federation (TSF) srwngnai bodol Roman Scriptni gosemwng biywi mwngsa patimwng krwikhlai kwchang kwchangni bisingtwi Raj Bhavan Abhiyan khlaika aro TSF-ni kaisa bodol Raj Bhavango thangoi hastephani daiyo memorandum blai yapharlaikha. Miyani TSFni Roman Scriptno lagwi khorang tisamanino kitingoi mwngsa hamya patimani koktma krwi. Tongkwchangni bisingtwino Raj Bhavan Abhiyan movement khlaijakkha.

Mator miyani TSFni Raj Bhavan Abhiyanno lagoi Tripura hasteni kisamisa koktma balai aro Social Media platforok aidakok, nang-nangya kok silchagoi koktma auailaimani nujakkha. Ibono lagwi tini kaisa Press Release saklaimani bisingtwi lukurokno sraicha khlaika TSF Central Committee. TSF Central Committeeni ongoi tangphang Hamalu Jamatia Press Releaseni bisingtwi saklaikha.

TSFni Roman Scriptni tongkwchang khorang tisamanino lagwi ‘Observer’ English koktma balai TSF holds ‘Raj Bhavan Abhiyan’, 15 injured, ‘Tripura Times’ English koktma balai TISF holds ‘Raj Bhavan Abhiyan aro ‘Syandan Patrika’ Bangla koktma balai Raj Bhavan Abhiyan Motha’ hinoi kokbobak thepagoi nang-nangya aidakoktma auaikha. I koktma auaimani iboni mwngsabo kwbwi krwi, ibo aidase, ibo TSF aro tongkwchangni bisingtwi khlaijakmani Raj Bhavan Abhiyanno bwmwng hamya, makhang hamya khlainani bagoise ibotwikhlai aidakoktma auaikha hinoi Press Releaseni bisingtwi saka TSF. Press Releasego khurchajak ibotwikhlai— 

“Observer Newspaper published a fake story titled “TSF holds ‘Raj Bhavan Abhiyan’, 15 injured”. The story is filled with false and baseless allegation to taint the image of the TSF and the peaceful movement. And the newspapers Times News published that “TISF holds Raj Bhavan Abhiyan” and Syandan Patrika published “Raj Bhavan Abhiyan Motha”. 

Press Releasego ibobo sraichakhlai saka, miyani Raj Bhavan Abhiyanno kitingoi mwngsa patimwng ongjakya aro TSFni kaisabo sakdukho majakya. TSF tongkwchangni bisingtwi khorang tisaka aro Roman Script biywi hastephani daiyo memorandum balai yapharjakkha hinoi. Press Releasego khurchajak ibotwikhlai— 

Tabok kok ongkha, Tiprasani jwngjal, mathai-soktaino lagwi jesa bodol, jesa motha khorang tisagoi movement khlaika hinklai ibono hasteni koktma balairok aidakok, nang-nangya kok silchagoi koktma auaimani nujagwk. Ibo simingya, TTAADC chongbari kaplai ongoi Tipra Motha poila hapango achokmani, thangnai 2023 Tripura Assembly chongbarigo Tipra Motha bataiywi khorokchitham MLA ongmani aro kebengnai bodolni ojama ongmani olo tabok hasteni chorok habanogo sebok khlainai Tiprasarokno makhang nukhlaine “TIPRA MOTHA’ hinoi hinjagwk aro thechra khlaijagwk. Sana thangklai ibo sitwi-nutwi Tiprasarokno hanang-pinang khlaimanise klaiywk. Miyani TSFni Roman Script biywi movement khlaimano lagwi hasteni koktma balairok aidakoktma auaimanibo porsa hanang-pinang hinoi khakamanwk.