KHNA KOHM-NI KANGBA KATAL BIJAP PHIYOKJAKNAI

23 June 2023, Agartala : khna 24 June salmarigo ‘Kokborok Tei Hukumu Mission (KOHM)’ bai karejak kangba katal bijapno phiyogoi rojaknai. Aga...

23 June 2023, Agartala: khna 24 June salmarigo ‘Kokborok Tei Hukumu Mission (KOHM)’ bai karejak kangba katal bijapno phiyogoi rojaknai. Agartala Krishnanagarni Dr. Bijoy Debbarmani tongthai nogo sareni dambrwi jora atlogo kaisa pana songchajakmani bisingtwi i kangba katal bijapno phiyogoi rojaknai. Kokborok Tei Hukumu Mission (KOHM) bai karejak i kangba katal bijaprokni bisingo tongo— 

1. Hapingo Srapsa- brwirokni koklop 

2. Republic of Jailand- Chandramani Debbarma 

3. Holongo Swijak Kokbiti- Dr. Bijoy Debbarma 

4. Tipra Jatir Bhagya- Aghore Debbarma 

5. Tipra Jati Bhishoye- Binoy Debbarma

I katal bijap phiyokma panago naruai ongoi phaiywi majakphainai KOHMni Kaksu kacham chlaktham Naphurai Jamatia, Narendra Debbarma, Chandramani Debbarma aro Aghore Debbarmani suk Urmila Debbarma. 

Panani achokphang ongoi achoknai ‘Kokborok Tei Hukumu Mission (KOHM)’ni twiphang Dr. Bijoy Debbarma. 

Lukurachapkrwng Sumanta Tripurani khuktwi rachapmwngni bisingtwi I panano chengoi rojaknai. Iboni olo kangba katal bijapno lagwi kokmalama salaijaknai, bijap phiyogoi rojaknai aro phaiywi majakjak naruairok koksagoi khanaronai. 

I panago nono khamkano phaiywi majakni bagoi khabai khukbai haido khlai ringkha ‘Kokborok Tei Hukumu Mission (KOHM)’ni twiphang Dr. Bijoy Debbarma.