Roman Scriptni Chobago TWF, Hastephano Yapharka Memorandum

24 June 2023, Agartala: Thangnai nokha talnoi taltham jora rwngwi Tripura hastego Kokborokno Roman Script bai gosemwng biywi Tripura haste g...

24 June 2023, Agartala: Thangnai nokha talnoi taltham jora rwngwi Tripura hastego Kokborokno Roman Script bai gosemwng biywi Tripura haste gangoi lukulok chobago akhomani bari bangrwk bangrwk ongoi tongwk.

Tipra Motha, YTF, TISF, TSF, TSU, RSKC, MFK aro kothe kothe kabangma hoda hukumu bodolrok Kokborokno jesakhlaiphano Roman Script bai gosemwng roni nangnai hinoi hasteni hastepha, cabinet montri, dagephang bai malailaikha aro bokni daiyo memorandum blaibo yapharlaikha. Ibo simingya lamago akholai khorang tisalaikha bodol bodolkhlai. I khorang tisathanigo hasteni naimwthang bodol bai hanang-pinangbo khlaijakkha aro casebo rojakkha. Aiphabo Roman Scriptni chobano kasomangnani iswkbo klaiyakho, ibo sraicha ongkha takkaisani Roman Scriptni choba numani olo. 

Tinibo Roman Scriptni gosemwng biywi Agartala doli lilangrogoi, lama lampra klwirogoi bwtang bwtang akhogoi khorang tisalaikha aro hastepha bai malaiywi memorandum blaino yapharlaikha Tipra Mothani brwi bodol.

Tini diphrwkni damchinoi jorago Tipra Womens'Federation (TSF) bodolni twidulmani bai Kokborokno Roman Script bai gosemwng biywi Raj Bhavan Abhiyan chenglaikha. I kuthungmwngo hasteni chorok amchaini TWFni adongjuksong phaiywi majakbaikha.

TWF bodolrok Raj Bhavan Abhiyan rwgwi poilago Astabal thwngkholago kuthunglaikha. Iboni olo Raj Bhavan phaichingo darikhlai hombotokni bisingtwi lamrolaimani, mator naimwthangrok water cannon lagwi bachalaisokjak. Circuit House korego kasokkhlaino naimwthang bodol bai beriket rogoi kasojakkha. Ualai-soklai krwi khlai tongkwchangni bisingtwi TWF bodolrok Circuit House koregono thainchakhlai khorang tisalaikha.

Assemblyni kebengnai bodolni ojama Animesh Debbarma Kokborokno 90% lukurok Roman Script bai suiyo aro chajagoi tongoibo Roman Scriptno gosemwng roya, Devanagari Script bai Kokborokno suina srwngrona naiywk. Hapang Roman Scriptno gosemwng royasak choba ongoi tongnai hinoi saka. Ibo simingya, bo Roman Scriptno gosemwng royagoi Devanagari Scriptno gosemwng ronani naimano Bharatiya Janata Janajati Morchani sakago chajakya ongmani kok khurchagoi kok larwkha.

Olo TWFni kaisa bodol Tripura hasteni hastepha boromgnang Satyadeo Narain Arya bai malaiywi memorandum blai yapharlaikha.

Khurchathai ongkha, tinini Roman Script biywi Tipra Mothani brwi bodolni choba khlaithanigo brwirokno arobo khabacharonani, chubanani bagoi Tipra Mothani lukuadongrokbo phaiywi majakkha. 

Iro Assemblyni Leader of Opposition Animesh Debbarma, TTAADCni achokphang Jagadish Debbarma, Tipra Mothani twiphang Bijoy Kumar Hrangkhawl, TTAADC-ni EM Suhel Debbarma, EM Ananta Debbarma, EM Bhaba Ranjan Reang, EM Dolly Reang, EM Runeil Debbarma, MLA Brishaketu Debbarma, MLA Sanjoy Manik Tripura, MLA Biswajit Kalai, MLA Ranjit Debbarma, MLA Nandita Debbarma Reang, MLA Swapna Debbarma, MLA Paul Dangshu, MDC song, Tipra Mothani brwi bodol ebakhlai TWFni okra-chakrasong chorokno tongbaiywk.