21 June 2023, Haflong: Assam hasteni Dima Hasao Autonomous Councilni bisingo kebo ST chla ebakhlai brwi Non-ST bai kaijakmani olo Dima Hasa...
Thangnai 17 June salmarigo Assamni Dima Sahao Autonomous Councilni Revenue and Settlement Departmentni siming No.Rev/RD/MISC/112/2023-24/4, Dated, Haflong, the 17 June 2023 bwmwngoi kaisa Notification kariywi ibotwijati kerongraida phnangnani bagoi saklaijakkha.
Tabok swngmwng kasagwi phaiywk, tomwng Assam haste Barotni kaisa haste ongoi ibotwijati kerongraida snamgoi mano hinklai Tripura hastegokhlai tmwi ibotwi raida snamgwi maya?
Satai klaiywk, tabok Tripura hastegobo kabangma ST brwirok Non-ST chla bai kaijakjagoi tongwk. Non-ST bai kaijakmani olo bihikni bwnwngoi basai ST-ni jega, nok-hok, mandwi-khundwi paiywi tongwk, choprogwi lagwi aro ST quotabo segoi tongwk. Bihik ST ni bwmwngoi paiphal (business) khlaithanigono ST quotago market stallrok lagwi aro hapangno tax rokbo roya ongmani nujagoi tongwk. Aini bagoi Tripura hastegobo ibotwijati kerongraidarok barikhlai nangsogo.
Chwng laithangjak bisirogo nukha, Tripura hasteni kabangma regional political bodol, hoda-hukumu motharok ST brwi Non-ST chla bai kaijakmani olo o kaijak brwini STni sep-sap konoronani aro manya khlainani bagoi kerongraida biywi khorang tisalaimani. Tabok i bimwngno arouaisa mwitokhlai rokha Assam hasteni Dima Hasao Autonomous Council hapang. DHAC hapangni ibotwi kerongraidano lagwi yapri semani STrokni bagoi barikhlai gam samwng hinoi kha kago. Tmwi hinba, i kerongraidani bisingtwi STrokni jega, ha, mandwi-khundwirok STni bwmwngoi Non-ST bai ha-jega, nokthai-hoktai sekjagoi lajakmani, choprojagoi lajakmanirok kisalai katiywi manwk.
Tabok Tripura hasteni STrokni jega-ha, nokthai-hoktai, mandwi-khundwi, ST quotarokno jai-jaikhlai rwngwi, boksagoi larwknani bagoi ibotwijati kerongraidarok Tripura hastegobo daktwi-daktwi khlai twbwini ongthwk aro samwngo phnangni ongthwk.
No comments