Roman Scriptni Gosemwng Biywi Raj Bhavan Abhiyan Khlaika TSF

22 June 2023, Agartala: Kokborokno Roman Script bai gosemwng biywi tabok Tripura haste gnangoi khorang tisalaijak. Kothe kothe motha aro bod...

22 June 2023, Agartala: Kokborokno Roman Script bai gosemwng biywi tabok Tripura haste gnangoi khorang tisalaijak. Kothe kothe motha aro bodolni phaichwngtwibo hastepha, montriokra, dagephang, DM, SDMni daiyo deputation rogoi memorandum blaibo yapharlaikha. Mator BJP-IPFT haste hapang Kokborokno Roman Script bai gosemwng roya! Twmwi roya iboni sraicha kok, hapangni phaichingtwi mwngsabo saklaijak krwi. Aini bagoi Kokborokno Roman Script bai gosemwng bimani tabok salni slai sal choba gara ongrwk ongrwk. Paithago Roman Scriptni choba bwswk jora gara ongno, bwjang atlogo kasokno ibo jorano naisingoi naithai. 

Miya 21 June salmarigo Twipra Students’ Federation (TSF) srwngnai bodol Roman Scriptni gosemwng biywi mwngsa patimwng krwikhlai kwchang kwchangni bisingtwi Raj Bhavan Abhiyan khlaika. 

Diphrwk jorago hasteni kabangma rwngnok, Colleggo srwngoi tongnai TSFni adongrok Agartalani Radhanagargo kuthunglaiywi, Raj Bhavan Abhiyanni bagoi baskango lam rolaiywk. Mator Raj Bhavan atlogo thangnani sakangono Circuit House korego hasteni naimwthang bodolrok beriket rogoi kasolaikha. Iboni olo TSFni kaisa bodol Raj Bhavango thangoi hastepha boromgnang Satyadeo Narain Aryani daiyo memorandum blai yapharlaikha. 

Ijang thangnai 14 Juneni TISF srwngnai bodolni Kokborokno Roman Script bai gosemwng biywi mass rally movement rwgwi patimwng ongmani koso TSFni Raj Bhavan Abhiyan rwgwi arouaisa mwngsa patimwng patiyatwi, kwchang kwchangni bisingtwi paironani bagoi naimwthang bodolni bwkhaktwi krak khlai yapri lajakkha. Aini bagoi miyani TSFni Raj Bhavan Abhiyan rwgwi mwngsa patimwng ongliya, kwchang kwchangno paikha.