ROMAN SCRIPTNI CHOBAGO TISF-NI SAKAGO CASE KHLAIKA TRIPURA POLICE

  16 June 2023, Agartala : thangnai 14 June salmarigo Kokborokno Roman Script bai gosemwng biywi Tipra Indigenous Students’ Federation (TISF...

 

16 June 2023, Agartala: thangnai 14 June salmarigo Kokborokno Roman Script bai gosemwng biywi Tipra Indigenous Students’ Federation (TISF)ni ringmwng bai Raj Bhavan Abhijanni Mass Rally Movement songchajakkha. O salgo Astabal thwngkholani siming rally khlaiywi TISF bodol Raj Bhavan atlogo thangtanigo Cercuit House korego beriket rogoi kasogoi rokha Tripurani naimwthangrok.

TISF bodol hastepha, montriokra, Tiprasa hamkrai montri bai malairodi hinoibo malaijakya, saknangya khlaijakmani bai TISF bodolni khorang tisanairok naimwthang bodolrok bai kisa kokbanglaimani nujakkha. Mwngsa hojak eba warning rojakya, miking khlaiyagwino TISFni sakago water cannon bai toikutung sarkha, tear gas kokkha aro lathi charge khlaika naimwthang bodolrok. Khorok chibani salai kabang khorang tisanairok sago dukho makha. 

Ibohaikai tongkwchangni bisingtwi Roman Scriptni chobago TISFni chrai-khnairok bujagoibo lengsoka, kerong raida baibo khajakkha. Bwswk birman klaijak tabok Kokborokni Roman Script biywi choba khlainairok. 

Miya 15 June 2023 salmarigo TISF-ni chobano lagwi protester ebakhlai khorang tisanairokni sakago kerong raida phnangoi case khlaika Tripura Police. New Capital Complex PS-ni siming TISFni Central Convenor Uttam Tripurano caseni notice hoka o caseno naikolnai I/O SI Debabrata Sinha. O Notice letterni despatch nombor ongkha New Capital Complex Police Station, No. 6373, Date 15/6/23. 

Case Ref. ongkha NCC P.S Case No.2023NCC050, dated 14.06.2023, U/S-120 (B)/147/148/149/332/253/427 of IPC and Sec. 03 of PDPP Act. 

O noticeno yago mamani olo salchani bisingo NCC PS daiyo thangoi I patimwngni caseno lagwi swngmwngni phirokmwng ronani bagoi sajakkha. Aiyakhlai kerong raidani bisingtwi krak yapri lajaknai hinoi noticeni bisingtwi saka. 

Koktmago sagoi majakkha TISFni Roman Scriptni chobago thangoi majaknai khoroksnini bwmwngoi case rojakkha. Bok ongkha Uttam Tripura, Sajara Debbarma, Apu Debbarma, Tapashi Debbarma, Manihar Debbarma, Smt. Gita Rani Debbarma aro Smt. Sharmila Debbarma. 

Tabok, kaisa kok ongkha NCC PS bai notice hojak TISF-ni convener ongkha Uttam Debbarma. Mator, lukurok simanitwi TISF-ni convener ongkha Uttam Tripura. Hinkai o Uttam Debbarma bai Uttam Tripura kaisa borokde ongkhna?  Ebakhlai kothe kothe de ongkhna?