14 JUNENI ROMAN SCRIPTNI CHOBANI PATIMWNGNO LAGWI SRAICHA KHLAIKA TISF

16 June 2023, Agartala: thangnai 14 June salmarigo Kokborokno Roman Script bai gosemwng biywi TISFni chobano kitingoi patimwng ongmanino lag...

16 June 2023, Agartala: thangnai 14 June salmarigo Kokborokno Roman Script bai gosemwng biywi TISFni chobano kitingoi patimwng ongmanino lagwi sraicha khlaika TISF bodol. Miya TISF bodol koktmathungnai pana ringoi sraicha khlai sagoi khanarokha lukurokno. 

Jora khajaktwi thangnai 14 June salmarigo Tipra Motha Party bai naikoljak srwngnai bodol Tipra Indigenous Students’ Federation (TISF)ni ringmwng bai Raj Bhavan Abhijanni Mass Rally Movement songchajakkha. Astabal thwngkholani siming rally khlaiywi TISF bodol Raj Bhavan atlogo thangtanigo Cercuit House korego beriket rogoi kasogoi rokha Tripurani naimwthangrok.

Olo naimwthang bodolrokno sasokmani olo TISFni kaisa bodolno hastepha Satyadeo Narain Arya bai malaironi tlangka. Mator hastepha TISF bodol bai malaini soiya. TISF bodol hasteni montriokra Prof. (Dr.) Manik Saha baiphabo malairodi hinmani montriokra hasteni phatargo thangjak hinoi bobaibo malaimaliya. Tiprasa hamkrai montri Bikash Debbarma baiphwng malairodi hinmani bobaibo malaimaliya. Ibotwikhlai paithago hastephani Private Secretary dualam kore jora phaiywi bokni memorandum blai siming yachakphaika, mator TISF bodolno hastepha bai malairoliya. 

Ibohaikhlai TISF srwngnai bodolno saknangya khlaijakmani bai TISF bodolni khorang tisanairok naimwthang bodolrok bai kisa kokbanglaimani nujakkha. Beriket rojakno sabaiywi hanani naiphugo mwngsa hojak eba warning rojakya, miking khlaiyagwino TISFni sakago water cannon bai toikutung sarkha, tear gas kokkha aro lathi charge khlaika. Ibobai kabangma Roman Scriptni gosemwng biywi choba khlainai chrai-khnairok sago dukho manbaikha. Khorok chibani salai kabang khorang tisanairok sago dukho makha. Bokno GBP Hospitalgo hojakkha. Sago dukho majakrokno kisamisa saknaikolgoi yakagwi hoka. Bana khorokchano siming barikhlaiyoi sago dukho manmani bai tabokbo GBP Hospitalgo saknaikojagoi matongdok. 

Naimwthang bodolrok TISF bodolno jeswk pharitwi chubachu rojak. Hastepha bai malaironibo tlangjak, sakdukho majakroknobo malkhong bai GBP Hospitalgo tlangjak hinoi saka TISF bodol.

TISF bodol ibobo saka, Tripura hapang ibotwikhlai bu-tok sikri-sokro khlaiywi Roman Scriptni chobano kasogoi maglak. Chwng Tipra Motha, YTF, TWF bai achoklai kokmalama salaiywi phainai salni chobani bagoi yapri ronai. 

Miya TISF bodol koktmathungnai pana ringoi sraicha khlaika hasteni lukurokno. I koktmathungnai panago TISF-ni ongoi I kokno sagoi khanarokha Sajra Debbarma. Koktmathungnai panago TISF Central Convenor Uttam Tripura aro TISFni ojamarok tongbaiywk.