15 June 2023, Agartala: miya Kokborokno Roman Scriptni gosemwng biywi Tipra Motha Party bai naikoljak srwngnai bodol TISFni ringmwng bai Raj...
Mator TISF bodolno Raj Bhavan atlogo thangtanigo kasonani bagoi swkangbariyano beriket dongwi tongsokjak hasteni naimwthang bodolrok. TISF bodol himbotokni bisingtwi dari dari khlai phailaimani Cercuit House koregono kasojakkha naimwthang bodolrok bai. Raj Bhavan atlogo thangnani sep rojakliya.
Roman Script biywi I mass rally movement daiyo TTAADC-ni EM Suhel Debbarma, Runiel Debbarma, MLA Sanjoy Manik Tripura aro Tipra Motha, Brwi bodol, sikla bodolni ojamarokbo phaiywi majakkha aro Roman Scriptni gosemwng biywi nangmani kok sagoi khnarokha.
TISF bodolrok Raj Bhavan atlogo thangoi deputation ronani bagoi uaire-uai samani olobo naimwthang bodolrok holiya. Paithago TISF bodolrok beriket sabaiywi baskango thangnani naiphukai naimwthang bodolrok water cannon bai toikutung sarka, ibo simingya tear gas kokkha, lathi charge rogoi saprakkha Roman Script biywi khorang tisani phainai gira-gira rwngsrwngnairokni sakago.
Naimwthangrok bai ibotwikhlai bu-tok khlaijakmani bai kabangma srwngnairok sago barikhlai dukho mankha. Bokno loge loge Agartalani GBP Hospitalgo ambulance bai hojakkha. Bok tabokbo GBP Hospitalgo sak naijagoi tongkho.
Naimwthangrok ibotwikhlai rwngsrwngnairokni sakago hanang-pinang bu-tok khlai chopromanino lagwi khorokcha rwngsrwngnai saka, naimwthangrok chini sakago raida chaiya khlai bu-tok khlaika. Chwng kwchang kwchang khlaise chini khorangno tisago. Lathi Charge, Water cannon bai toi sarna, tear gas koknani sakango mwngsa hojak khlairojakya chwngno. Bok ibotwikhlai bu-tok, sikri-sokro, phran-ko bai chini Roman Scriptni chobano mwthagoi maya, kasogoi maya!
Sibani Debbarma bwmwngoi aro khorokcha Tiprajuk saka, TISF Roman Script biywi kwchang kwchangkhlai khorang tisalai tonglaimanise achamitini bokni sakago water cannon bai toikutung sargo, tear gas kogo, lathi charge khlaiywk. Ibobai kabangma rwngsrwngnairok sago dukho manbaikha. Naimwthangrok ibohaiklai srwngnairokni sakago water cannon bai toikutung saryagoi, lathi charge royagwi, tear gas kokyagoi kwchang kwchang khlaino naikolmankhamwng hinoi.
Naimwthangrok bai araikhlai toi sarjakmani, lathi charge rojakmani bai kabangma rwngsrwngnairok sago dukho manbaikha. Koktma manmani bisingtwi TISF Central Committeeni Convenor Uttam Tripura aro khorok chibaswk rwng srwnganirok sago dukho manbaikha. Tabokbo khorokba-khorokdok GBP Hospitalgo sak naijagoi tongdok. Kisamisa sago dukho majakrokno sakgamnogo naikolgoi bithi suirogoi yakagwi hoka.
Ibotwi selengmasangcha patimwngni koktma manoi, dukho majak rwngsrwngnairokno GBP Hospitalgo thangoi naithangka aro dukho majakrok bai kokmalama salaika hasteni kebengnai bodolni ojama Animesh Debbarma, TTAADC-ni CEM Purna Chandra Jamatia, EM Suhel Debbarma, EM Ananta Debbarma, EM Runiel Debbarma aro Tipra Mothani ojamasong.
Kebeng bodolni ojama Animesh Debbarma koktmathungnairokno saka, Kokborokno Roman Script bai gosemwng biywi rwngsrwngnairokni chobago naimwthangrokni ibotwikhlai bu-tok khlaimani, ibo bari selengmasangcha patimwng. I patimwngno ulogo sororokni yak krwngjak tong ibono lagwi kaisa high levelni inquiry khlaiywi srwngnairokni sakago lathi charge ronairokno krak majra roni ongthwk aro dukho majakrokno senior doctor bai gamkhlai sak naironani bagoi hapang barja lathwk hinoi hasteni montriokra Prof. (Dr.) Manik Sahani daiyo kokkwcharkha.
Bo arobo saka, ibohaiklai srwngnairokni sakago bu-tok khlaiywi TISF-ni chobano kasogoi maglak. Roman Scriptno lagwi aro choba khlainani nangyatwi hapang yapri seni ongthwk. Tomwng jorani bisingo hapang mwngsa yapri seya hinklai Roman Scriptno lagwi arobo garakhlai chobago akhojaknai hinoi saka machang Animesh Debbarma.
I patimwngni koktma manoi Tipra Mothani kasku ebakhlai bobagra Pardyot Kishore Manikya bo saknaikoljagoi tongmani bai hastego krwiphabo, facebook liveni bisingtwi I patimwngno selengmwng phunuka aro I sal kaisa Black Day hinoibo saka. Roman Script biywi khorang tisathanigo khorang tisanairokni sakago ibotwikhlai phran-ko khlaimanino krak khlai inquiry khlaini ongthwk. Roman Scriptno lagwi hapang mwngsa yapri seya hinklai thinango arobo garakhlai choba khlaijaknai hinoi saka.
I patimwngno lagwi miyano Press Releaseni bisingtwi selengmwng phunuka, Twipra Students’ Federation (TSF) bodol bai Tribal Students’ Union (TSU) srwngnai bodol. Srwngnairokni sakago ibotwijati selengmasangcha patimwng patimanino gamkhlai inquiry khlaini ongthwk aro SP Westno daktwi-daktwi suspension khlaini ongthwk hinoi deman khlaika TSF bai TSU Bodol.
Miayni TISFni Roman Scripto lagwi kwchang kwchang choba khlaimanigo water cannon nai toisarmani, lathi charge romani, tear gas kokmani bai srwngnairok dukho manmani patimwngno lagwi tini 15 June salmarigo Bangladesh hagarani srwngnai bodol ‘Tripura Chattra Sangshad (TCS)' kaisa Press Releaseni bisingtwi selengmwng phunuka aro TISFni chobano support khlaikhoka.
Ibo simingya, miyani patimwngno lagwi hasteni sijak-nujakrokbo social median bisingtwi selengmwng phunugoi khorang tisaka aro TISF-ni chobano support khlaika.
No comments