Madhyamik-Kuchuk Madhyamik Pass Khlaijakrokno Borom Yapharkha TCB Karbook Moyal

29 June 2023, Karbook:  takhlai Karbook amchaini Madhyamik aro Kuchuk Madhyamik Examination daiyo pass khlaijak Tripura dophani srwngnairokn...

29 June 2023, Karbook: takhlai Karbook amchaini Madhyamik aro Kuchuk Madhyamik Examination daiyo pass khlaijak Tripura dophani srwngnairokno borom yapharkha Tripura Chubalai Buthu, Karbook Moyal.

Karbookni Bashi Chandra Para Class XII Schoolni CRC Hall daiyo songchajak borom balai yapharma panani bisingtwi Tripura dophani srwngnairokno borom balai yapharjakkha.

Tinini i borom balai yapharma panago naruai ongoi phaiywi majakkha Karbook Assembly chongbari achokthaini MLA machang Sanjoy Manik Tripura, Tripura Chubalai Buthu, Central Committeeni twiphang machang Sachindra Tripura, twiphang-yakchu machang Dhirendra Tripura, rangphang machang Damodhar Tripura aro Tripura dophani Pomang, Tripura Chubalai Buthu, Karbook Moyalni tangkrasong.

Tinini i panago Karbook Sub-Divisionni khorok 150 ni salaibo kabang Madhyamik aro Kuchuk Madhyamik Examination daiyo pass khlaijak Tripura dophani srwngnairokno borom yaphargoi lamjojakkha.

Tripura Chubalai Buthuni ibotwikhlai borom balai yapharma pana bana kaisa moyalgo siming bathangoi tongya, ibo hasteni chorok moyalgono borom yaphargoi lamjojaknai takhlai Madhyamik aro Kuchuk Madhyamik Examination daiyo pass khlaijak Tripura dophani srwngnairokno.

Tinini i panago phaiywi majakjak naruairok Tripura dophani srwngnairokno rwngno lagwi gam uansoknani, professional course lagwi gamkhlai porenani, gam gam examination daiyo achoknani, TPSC, UPSC examination daiyo achoknani emang tongdi aro dopha hamkraini samwngo khabachagoi samwng tangdi hinoi sagwi khnaromani bisingtwi nangmani kokbiti rolaikha. Ibo simingya, TCBni motto 'Sichadi Bachadi'no lagwibo nangmani kok sagwi khanarokha.