18 June 2023, Agartala: ‘Greater Tipraland’ bimwngni khorangno tansogoi Tipra Motha bai halok sachogoi BJP bodolgo yapri rokha kaisni Assemb...
18 June 2023, Agartala: ‘Greater Tipraland’ bimwngni khorangno tansogoi Tipra Motha bai halok sachogoi BJP bodolgo yapri rokha kaisni Assembly achokthaini Tipra Mothani khorokchitham tangkrarok. I koktma Tipra Motha khlainairokni bagoi koktma gamya hinoino mano. Ibo simingya ibo haiklai dopha hamkraini kok kwtwi sa sagwi lukurokno phemlogoi paithagokhlai Tipra Motha yakagwi arokaisa bodolgo yapri rolaimani ibo Tipra Mothani thinangni kokbo kasai phaiywk. I swngmwngbo kasai phaiywk, Tiprasarok soi soi hamjaknai sorolai?
Miya 17 June salmarigo BJP Tripura Pradeshni habanogo songchajak Joining Programeni bisingtwi Tipra Motha yakagoi phainai khorokchitham tangkrarokno bodolni bana rwngrogoi bodolgo lamjookha BJP Tripura Pradeshni ojamarok.
Tipra Motha yakagoi BJP bodolni bana rwngnairokni bisingo tongo Tipra Mothani Senior Leader Biching Debbarma, 46-Surma achokthaini Tipra Mothani High Level Committeenni adong Kumar Halam, TWF Central Committeeni Vice-President Radha Mala Debbarma, YTF Central Committeeni Vice-President Ranjit Molsom, ILEC Ambassa Tipra Mothani Ex-Chairman Kamalson Halam, Tipra Mothani CPD Vice-President Biswajit Debbarma, Teliamura Political Districtni rangphang Binoy Debbarma, 46-Surma achokthaini Tipra Mothani Vice-President Santi Debbarma, 17-Golaghati Block Committeeni President Sahil Debbarma, 17-Golaghati Block Committeeni YTF Secretary Shyamal Debbarma, Maharani ADC Villageni Chairman Rabi Debbarma, Tipra Mothani adong Sudhin Debbarma, Jiban Debbarma.
Tipra Motha yakagwi phainairokno BJP bodolni bana rwngrogoi bodolgo lamjosoka Lok Sabhani MP machang Rebati Tripura, hasteni Tribal Welfare montri Bikash Debbarma, MDC Padma Lochan Tripura, MDC Bidyut Debbarma, Bharatiya Janata Janajati Morcha Tripura Pradeshni tangphang David Debbarma, BJP Tripura Pradesh President Rajib Bhattacharya song.
Radha Mala Debbarma saka, Tipra Motha yakamani pher ongkha lukurokni bagoi jai-jaikhlai samwng khlainani, hamkrai khlainani. Bo ibobo saka, bo bisitam rwngoi Sub-Zonalgo tongoibo lukurokni hamkraini bagoi lama rutugoi maliya. Aini bagoi Sub-Zonalni barja aro Tipra Mothano yakagwi tini BJP bodolgo yapri rogwk.
Biching Debbarma saka, BJPgo phaimani aro Tipra Motha yakamani kaisano pher lukurokni bagoi samwng khlainani. Tipra Mothago lukurokni bagoi samwng khlaimaliyade hinoi koktmathungnairok bai swngjakmani olo Biching Debbarma arobo saka, ADC-go kaisa girasakhlai administration tongo, I administrationni official mwngsa systematic krwi. Greater Tipraland bimwngno lagwi saka, ibo constitutionalni raidago tongwk. Mator, Greater Tipralandni kwbwi kokmang tma, twmwi i kokthaino thepanani nangkha, twmwi i kokthai sopaini nangkha, ibo soi-soide Tiprasarokni mwthangjaknani bagoide ongkha, i kok sraichaya ! Ang sakbaithangobo sraichayakho! Angno kosol Tipra Mothago tongoi tongnai tangkrarok, support khlainairokbo sagwi maya ongkhna Greater Tipralandni kokmang tma. Jephugo Sinai aiphugo ani lamago himnai hinoi ang kha kagwk, saka Biching Debbarma.
O salgo soro soro Tipra Motha yakagoi BJP bodolgo hapaikha bokni mwngrokbo saklaikha aro nangmani kok sagoi khanarokha Lok Sabhani MP machang Rebati Tripura.
Miyago Tipra Mothani khorokchitham tangkrarok Tipra Motha yakamanino lagwi tongkosong tongnai lukurokni daiyo kabangma swngmwng kasagwi tongwk. ‘Greater Tipraland’ bimwng bai aro thainchani pal pal khorang bai, kesok-kusungg mwnakni yoknani bagoi emotional onglaiywi Tipra Mothano vote rolaiywi kaplai khlaiywi Tipra Motha poila TTAADC hapango achoknani sep makha.
Iboni olo Constitutional Solution aro Greater Tipraland bimwngno lagwi thangnai 2023 Tripura Legislative Assembly chongbarigobo bataiywi Tipra Motha kaichitham achokthaiyo kaplai ongoi khorokchitham MLA bai kebengnai bodolgo achokkha. Ibo haiklai Tipra Motha tlwk-tlwk phran ongsagoi phaichamanise.
Mator Assemblyni chongbari paimani talthamni bisingo Tipra Mothani bisingo tma patimwng patilaikha, tma jwngjal achailaikha je dari-darikhlai Tipra Mothani tangkrarok bodol yakalainani nangkha? ‘Greater Tipraland’ bimwng bai bobagrani thainchani khorang bai iswk chiriklai dophani bagoi khaklap bugwi kralaimani, lukurok chubalaimani iboni mulaja bwjang thangka? Ibohaiklai thinango Tipra Motha Tiprasani bagoi mwthangjaknani lamade saiywimano? Tabok haste gnangoi khugo khugo thare-barekhlai ibotwijati swngmwngrok tisajagoi tongwk !
No comments