1 February 2023, New Delhi: Barotni boromgnang habokhrok machangjuk Droupadi Murmu bai baksa Tripura dophani Naran machang Birendra Tripura...
Barotni boromgnang habokhrok machangjuk Droupadi Murmu bai baksa Tripura dophani Naran machang Birendra Tripura aro Jamatia Hodani Hodaokra Manindra Kumar Jamatia
Tripura dophani Naran machang Birendra Tripura aro Jamatia Hodani Hodaokra machang Manindra Kumar Jamatia miya New Delhigo Barotni boromgnang habokhrok machangjuk Droupadi Murmu bai malaikha. Arjun Munda bai malaikha.
Thangnai 26 January New Delhigo hagara beremni Barotni bisi uaisnichibrwi Lukuphran Sal palaijagwk. I sal palaima panago Barotni chorok hagirani khorok rasani slaibo kabang hodani boromgnang adong, kothe kothe hodani samjpati ebakhlai hoda okrarok, sikrwng-uansokrwng, suikrwngrokno borom rogoi ringkhoka. Bokno salchi jora rwngoi Barotni laibuma rwkjak jegarok (historical place) beraiywi phunujakkha. Bokno Barotni Parliament nogobo tlangjakkha.
Ibo simingya, bokno Barotni Union Tribal Affairs tangbedeni boromgnang montri machang Arjun Munda bai malairokha, Barotni habasarokni kabangma jwngjalni kokroknobo salaikha.
Iboni olo malaikha Barotni boromgnang habokhrok machangjuk Droupadi Murmu bai. Droupadi Murmu ongkha Barotni poila habasa dophani habokhrok. Bok Barotni habokhrok bai malaini sep ongma ibo chorokni bagoi barikhlai khatongmani kok. Iro Tripura hani ongoi Tripura dophani Naran machang Birendra Tripura bai Jamatia Hodani Hodaokra machang Manindra Kumar Jamatia thangoi majakmani ibo bana Tripura dopha bai Jamatia dophani bagoi khatongjaknai simingya ibo chorok Tiprasarokni bagoi khatongjaknai. Tmwi hinba jabwirogo ibotwi khlai Tripura hani Tiprasa hodani ojamarokno borom rogoi ringoi tlangjakmani aro habokhrok bai malairomani koktma khnayakho! I malaimwng Tiprasarokni bagoi kaisa laibuma ongoi tongrwknai hinoi kha lagwk.
No comments