Gondatwisa : Thangnai 7-8 January 2023 salmarigo Dolai Hangkorni Gondatwisagni Block Level Institute of Teacher Education daiyo salnoi jora ...
Gondatwisa: Thangnai 7-8 January 2023 salmarigo Dolai Hangkorni Gondatwisagni Block Level Institute of Teacher Education daiyo salnoi jora rwngoi songchajakkha Tripura Chubalai Buthu, Central Committeeni 10th Central Conference pana.
Panani paithak salgo Tripura kokbai koktma balai 'Uakhring', Issue No.2 karejakkha.
I koktma balaino kokmithingka katal jorani suikrwng machang Khumpui Ray Tripura. I koktma balai nokha taldogo kangsa khlai karejagoi tongwk. Iboni poila bwkhrang karejakkha June-July 2022 bisigo. I koktma balaino sapaiywi karekha Tripura Writers' Forum, Central Committee.
Tripura kok aro kokrabaini hamkraini bagoi Forum yakchoyagoi khlai samwng tangoi tongmani bisingo i koktma balai karemanibo porsa phunumari. Iboni sakango Forumni bakhaktwi khlai Tripura kok aro kokrabaini hamkraini bagoi kabangma por kokrabai balai, koktma balai aro kokrabai bijaprok karejakkha. Tripura kok aro kokrabaini hamkraini bagoi i koktma balai kaisa dong ongoi tongnai.
I koktma balai daiyo Tripura hagirani Tripura suikrwngrokni badebo Bangladesh hagarani suikrwngrokni suimwngrokno achokthai rojakkha.
Conferenceni paithak salni panago phaiyoi manjakkha kacham MLA machang Nirajoy Tripura, kacham MLA machang Burba Mohan Tripura, Tripura dophani Naran machang Birendra Tripura, Tripura Chubalai Buthu Advisory Committeeni katal chongjak kasku machang Prasun Kanti Tripura, Chubalai Buthu, Central Committeeni twiphang machang Sachindra Tripura, tangphang machang Taranisen Tripura, tangphang yakchu machang Sanmani Tripura, Tripura Brwi Buthu, Central Committeeni tangphang machangjuk Nilima Tripura, Tripura Chubalai Buthu Sonamura Divisional Committeeni twiphang machang Alipada Tripura, Tripura Writers' Forum, Central Committeeni twiphang machang Dharinjoy Tripura, i koktma balaino kokmithingnai suikrwng machang Khumpui Ray Tripura, suikrwng machang Sarup Tripura aro Tripura dophani okra-chakrarok.
Panago phaiywi majakjak naruairok Tripura dophani hamkraino lagwi nangmani kok sagwi khanarokha. Aro panago phaiywi majakjak lukurokni daiyo i koktma balaino bakgwi rojakkha.
No comments