Tripura Kokbai Katal Koktma Balai 'Hanrtwng' Karejakkha

Gondatwisa:  Thangnai 7-8 January 2023 salmarigo Dolai Hangkorni Gondatwisago salnoi jora rwngoi songchajakkha Tripura Chubalai Buthu, Centr...

Gondatwisa: Thangnai 7-8 January 2023 salmarigo Dolai Hangkorni Gondatwisago salnoi jora rwngoi songchajakkha Tripura Chubalai Buthu, Central Committeeni 10th Central Conference pana. Pana chengsamani olo 'Hanrtwng' bwmwngoi Tripura Kokbai katal koktma balai karegoi rojakkha.

I 'Hanrtwng' koktma balaino kokmithingka katal jorani suikrwng machangjuk Jabanika Tripura. I koktma balai nokha taldogo kangsa khlai karejaknai. 

I koktma balai karephugo panago phaiywi majakkha Tripura hagirani kacham MLA machang Nirajoy Tripura, TTAADC-ni kacham EM machang Pratiram Tripura, Tripura dophani Naran machang Birendra Tripura, Chubalai Buthu, Central Committeeni twiphang machang Sachindra Tripura, tangphang machang Taranisen Tripura,  Tripura Brwi Buthu, Central Committeeni tangphang machangjuk Nilima Tripura, Tripura Chubalai Buthu Sonamura Divisional Committeeni twiphang machang Alipada Tripura, Koromtwisa Moyalni Pomang Gasa Kumar Tripura, suikrwng Khumpui Ray Tripura, Sarup Tripura aro Tripura dophani okra-chakrarok. 

I koktma balaino sapaiywi karekha Tripura Writers' Forum, Central Committee. Tripura kok aro kokrabaini hamkraini bagoi Forum yakchoyagoi khlai samwng tangoi tongmani bisingo i koktma balai karemanibo porsa phunumari. Iboni sakango Forumni bakhaktwi khlai Tripura kok aro kokrabaini hamkraini bagoi kabangma por kokrabai balai, koktma balai aro kokrabai bijaprok karejakkha.

I koktma balai daiyo Tripura hagirani Tripura suikrwngrokni badebo Bangladesh hagarani suikrwngrokni suimwngrokno borom rogoi achokthai rojakkha.

Panago phaiywi majakjak naruairok i koktma balai aro Tripura kokni hamkraino rwgwi nangmani kok sagwi khanarokha.