TIPRA-IPFT BODOL MALAIKHA

Tipra Motha bai IPFT Bodolni ojamarokni malaimwng 22 January 2023, Guwahati: Phainai 2023 Tripura Legislative Assemblyni chongbari jesa bodo...

Tipra Motha bai IPFT Bodolni ojamarokni malaimwng

22 January 2023, Guwahati: Phainai 2023 Tripura Legislative Assemblyni chongbari jesa bodolni daiyo barikhlai nangmani. Chongbarini salmari saklai paijak Barotni chongbari commission. Takhlaini Assembly chongbarigo Tipra Motha bai je bodol aphak ongnai o bodol kaplai ongnai, Ibo chorok political bodolno gamkhlai siywk. Aini bagoi chorok bodolno naiywk Tipra Motha bai aphak ongoi chongbarigo bachanani.

Ijang bobagra swkangbariyano sagwi tongjak 2023 Assembly chongbari Ibo Tiprasani bagoi thwinai ebakhlai thangnai araijati. Tiprasani mwthangjaknani bagoi paithak choba. Je bodol Greater Tipraland ronai Sinai written suiywi ronai o bodol bai Tipra Motha chongbarigo aphak ongoi bachalainani uansoknai. Bobagra I kokbo sagwi tongo tomwng Greater Tipraland bimwng royagwi aro kothe gam Tiprasani bagoi thangwi tongjaknai Constitution Solution uansokjak tongkhlai ibonophabo written suiywi rokhlai Tipra Motha jesa bodol bai aphak ongnani uansoknai.

Ibotwi jorago bobagra naiywk IPFT bodol Tipra Motha bai thaincha ongwi phaisithwk. Tmwi hinba tabok Tiprasarok kothe kothe khlai bodol khakjagwi batainani joraya, tabok thainchani jorase. Jeswk bodol bangnai iswkno Tiprasani bagoi vote bakjaknai. Ibo simingya jeswk bodol bangnai iswkno ualaimabo phainai. Aini bagoi bobagra kha khulagoi IPFT bodolno thainchago phainani bagoi IPFT Central Committeeni Working President ebakhlai montri Prem Kumar Reangno bobagra kokton suijak thangnai 13 January 2023 salmarigo. 

Iboni olo IPFT Central Committeeni Working President ebakhlai montri Prem Kumar Reangbo bobagrano kokton suiywi khorang yachaksoka aro bobagrano kokton suiywi kok phiroka thangnai 18 January 2023 salmarigo.

Iboni olo miya 21 January 2023 salmarigo IPFT Bodolni ojamarok Tipra Mothani ojamarok bai malaikha aro kokchaplaikha. 

Bobagra naiywk IPFT bodolni bimwng ongkha Tipraland aro Tipra Mothani bimwng ongkha Greater Tipraland, kainoi bodolni bimwngno ongkha Tiprasani mwthangjaknani bagoi kothe khlaiywi ha Tipraland. Aini bagoi IPFT bodolno Tipra Motha bai thaincha ongoi phaisidi hinoi kok kwcharkha. Tmwi hinba tabok yago bari jora kisa, aini bagoi bobagra kha khlaiywk IPFT bodol jorani bisingo kwbwi kwthar samwngo yachagoi lanwk.

Tabok thainchani kokno uansogwi IPFT bodol jora kisani bisingo tma uansogoi yapri seno ibono naisingjak hani lukurok aro political bodolrok. 

Tipra Motha bai IPFT bodolni I malaimwng daiyo tongwk bobagra ebakhlai Tipra Mothani kasku Maharaja Pradyot Kishore Manikya, Tipra Mothani twiphang Bijoy Kumar Hrangkhawl, TTAADC-ni achokphang Jagadish Debbarma, TTAADC-ni EM Chitta Ranjan Debbarma, IPFT Central Committeeni Working President ebakhlai montri Prem Kumar Reang, MLA Prashanta Tripura, IPFTni Budhu Debbarma song.