Amra Bangalini Batainairokni Bisingo Chakma Dophani Borok!

31 January 2023, Agartala: Barotni jesa hagirago national political partyni badebo regional party hinoi tongwk. I regional partyno hagirani ...

31 January 2023, Agartala: Barotni jesa hagirago national political partyni badebo regional party hinoi tongwk. I regional partyno hagirani politicsno kutungbo khlaimago, hingbo khlaimago, habasarokni jwngjalni kokno lagwi bimwng biywi khorang tisamago. Jesa regional partyno khibiywi hapang achokthani uansokmaya. 

Ibotwikhlai Tripura hago Amra Bangalibo kaisa regional party tongwk. Bok Bangali ebakhlai uanjwi dophani mathai-soktaino lagwi khorang tisani bagoibo Amra Bangali bodol songchajagwk. Jora joragobo bok chongbarigobo bataiywk.

Takhlaini 2023 Tripura Legislative Assemblyni chongbarigo Amra Bangali kainoichidok (26)  achokthai daiyo batainani bagoi khorok noichibrwi batainairokni bwmwng saklaikha miya 30 January salmarigo.

I kainoichidom achokthaini bisingo kaibrwi achokthai daiyo batainai ongkha Chakma dophani borok.

47-Ambassa bai 59-Pecharthal i kainoi achokthai daiyo batainai ongkha Karnadhan Chakma. Aro 48-Karamcherra bai 60-Kanchanpur i kainoi achokthai daiyo batainai ongkha Smt. Indrakhala Chakma.

Amra Bangali bodolni ongoi i Assembly chongbarigo batainairokni bwmwng saklaijakmanigo Chakma dophani borokni bwmwng nugoi Tripura hani lukurok barikhlai uanajakmani nujakkha. Tmwi hinba social mediani bisingtwi kok kasamani nujakkha, Amra Bangali bodol ongkha Uanjwi dophani hamkraini bagoi khajakmani kaisa bodol aro Chakmarok Tripura hani kaisa habasa hinoi sinijagwi ST-ni sep sap magoi tongwibo braikhlai Chakma dophani lukurok Amra Bangali candidate ongkha ibo tabok swngmwng kasajak. 

Jesanophabo ongrathwk, jesa borok chongbarigo batainani sep rutugwk. I daiyo Karnadhan Chakma bai Smt. Indrakhala Chakma chongbarigo batainani sep magwi chongbarigo kaplaide onglai phaimano hinoi auaimwngo akhojak hinoi koktma.