17 November 2022, Agartala: Agartalani Maharaja Bir Bikram Airport daiyo birkhong bai krwngjak thang-laisoni kokthum lukurokni daiyo Kokboro...
17 November 2022, Agartala: Agartalani Maharaja Bir Bikram Airport daiyo birkhong bai krwngjak thang-laisoni kokthum lukurokni daiyo Kokborok kok bai auaijaglak hinoi bobagra Pradyot Kishore Manikyano koktonni phirokmwng rogoi sakokha Barot hagarani Civil Aviation bedekni montri machang Jyotiraditya Scindia. Ibo Tripura hasteni Kokborok kok sanai lukurokni bagoi barikhlai uanajaknai aro khakhamjaknai koktma.
Khurchatai klaiywk, Lok Sabha, Salka Tripura achokthaini kacham MP machang Jitendra Chaudhuryni chaitokmani bai Agartala Airport daiyo Kokborok bai auaimwng khlaijakkha 2016 bisigo. Ibo simingya Tripura hasteni chorok Railway Station daiyobo Kokborok bai auaijakkha. Machang Jitendra Chaudhury bo 26 February 2016 bisigo Parliamentni Sessiongo bimwmg biywi khorangbo tisaka. Iboni olo 8 April 2016 bisigo Union Ministry of Civil Aviation montri P.Ashok Gajapathi Raju D.O.No.H-11021/21/2016-AAI-MoCA/113937 Notificationni bisingtwi saklai rokha Agartala Airport daiyo Bengali, English aro Hindini logego Kokborok baibo auaijaknai chorok kokthum.
Mator, 2016 bisigo Kokborok bai auaikhlaijakphabo ibo kisa jorani bisingo auaimwng mwthakrojakkha. Tomoi mwthagoi rojakkha iboni sraicha kokthum kehabo siya. Aini bagoi tabok Agartalani Maharaja Bir Bikram Airport daiyo birkhong bai krwngjak thang-laisoni kokthum lukurokni daiyo Hindi, English, Bangla kok bai siming auaijagwi tongwk. Mator hasteni habasarokni kok bai auaijakya.
Aini bagoi Hindi, English, Bangla kokni logego Kokborok baibo auimwng khlainani bimwng biywi Tipra Mothani ojama bobagra Pradyot Kishore Manikya thangnai 31 October 2022 salmarigo New Delhigo Barot hagarani Civil Aviation bedekni montri machang Jyotiraditya M. Scindia bai malaiywi kokmalama salaika aro memorandum blai ephaka. Aiphugo bobagrani logego Barotni Football bodolni kacham ojama machang Baichung Bhutiabo tongwk.
Mator, Jyotiraditya Scindia bai bobagrani aiphuni malaimwng aro bimwngni batha koroikha !
Thangnai 16 November 2022 salmarigo Barot hagarani Civil Aviation bedekni montri machang Jyotiraditya M. Scindia bobagra Pradyot Kishore Manikyano D.O.No.AV-24032/219/2022-AD/229662-F, 16 November, 2022 kokton blaini bisingtwi sakokha, Airports Authority of India (AAI)ni khajak raidatwi airport daiyo kaisa local language, Hindi aro English bai auaimwng khlaijagwk. Iro Bengali bai Kokborok I kainoi kokno Tripura haste haphangni kok hinoi saklaijak. Mator korekara amchairogo agatiya kabang khlai sajakmani bagoi airport daiyo auaithanigo Bengali kokno larwkjakkha.
Civil Aviation montri Jyotiraditya M. Scindia koktma balai daiyo khurchagoi saka,
"Please refer to your letter dated 31.10.2022 regarding announcement in indigenous language at maharaja Bir Bikram Airport, Agartala.
I would like to apprise you that in accordance with the extant policy of Airports Authority of India (AAI), the announcements are made at airports in three languages- one local language, Hindi and English.
Though, Bengali and Kokborok, both have been declared as State Languages by the Government of Tripura, Bengali has been preferred for announcements at the airport due to its wide spread use in the nearby areas".
I kokton balaino bobagra social mediatwi lukurokno phunumani olo hasteni Kokborok sanai lukurok barikhlai uanajakkha aro khabo khamlaijakkha. Twmwi hinba, Tripura hasteo bana Bengali kok sanai lukurok simingya, Kokborok kok sanai lukurokbo tongwk. Kokborok kok sanai lukurok khlai birkhong kayade ongkhna? Yakong baide Kolkata, Delhi, Mumbaigo thangkhna? Ibotwi swngmwngrokbo kasaka kha khamjak lukurokni daiyo.
Lukurok naiywk, Agartalani Maharaja Bir Bikram Airport daiyo birkhong thang-laisoni chorok kokthum Kokborok baibo saklaijakni ongthwk, auaijakni ongthwk hinoi tabokbo tisalaijak khorang.
No comments