Tripura Employees Associationni Poila Gondatwisa Moyal Committee Khajakkha

Agartala , 12 September 2022: miya Gondatwisa CRC Hall daiyo Tripura Chubalai Buthu, Central Committee bai Gondatwisa Moyal Committeeni thai...

Agartala, 12 September 2022: miya Gondatwisa CRC Hall daiyo Tripura Chubalai Buthu, Central Committee bai Gondatwisa Moyal Committeeni thaincha khlai jugalmwng bai songchajakkha Tripura Dophani sebok khlainairokni motha Tripura Employees Associationni Gondatwisa Moyal committeeni kuthunglaimwng kokmalama pana. 

Iro satai klaiywk thangnai 26 July 2022 salmarigo Agartalani Bhagat Singh Youth Hostel daiyo Tripura Chubalai Buthu, Central Committee bai songchajak Tripura dophani hoda-hukumu, rwngno lagwi kuthunglaimwng kokmalama pana daiyo Tripura dophani sebok khlainairokno lagwi kaisa katal motha khanani bagoi kok chapjakkha. Kokchapjakmanitwi kaisa Ad-hoc committeebo khajakkha.

Tripura Employees Associationni Central Conference khlaini sakango hasteni chorok moyalgo committee khanani saklaijak tongmanitwi miya Gondatwisa Moyal daiyobo kaisa kuthunglaimwng kokmalama panani bisingtwi Tripura Employees Association Gondatwisa Moyal Committee khajakkha.

Iro phaiywi majakkha Tripura dophani Naran machang Birendra Tripura, Tripura Chubalai Buthu, Central Committeeni twiphang machang Sachindra Tripura, Central Committeeni tangphang machang Taranisen Tripura aro Tripura Chubalai Buthu, Central Committeeni poja majak okrarok. Ibo badebo Gondatwisa Moyalgo  khorok dokchini slaibo kabang Tripura dophani sebok khlainairok phaiywi majakkha.