Maiyong Thangpaiywi Romo Kogo MDC Hongsha Kumar Tripurani Sakago Agartala, 12 September 2022: jabwi jabwini siming Tripura dophani kokbwkhrw...
Maiyong Thangpaiywi Romo Kogo MDC Hongsha Kumar Tripurani Sakago
Agartala, 12 September 2022: jabwi jabwini siming Tripura dophani kokbwkhrwi eba kokkhorai eba kokphemlogo sajakmani tongo 'Maiyong Thangpaiywi Romo Kogo'. I kokbwkhrwi eba kokkhorai BJP bodolni daiyobo nujakkha.
TTAADC-ni kebengnai bodolni ojama ebakhlai BJP bodolni MDC machang Hongsha Kumar Tripura sai-sai lukurokno loge tlangoi thangnai 23 August 2022 salmarigo Manikpurgo songchajak TTAADC sal palaima panago Bobagra Pradyot Kishore Manikyani yak rwngwi BJP bodol bai halok sachogwi sakni achokthaino khibigwi dopha hamkraini samwng tangni hinoi TIPRA Mothani bana rwngpaiywk.
Ibo simingya Hongsha Kumar Tripura bo TTAADC-ni kebengnai bodolni ojamani achokthaibo yakagwi rojak. Mator aiphugo BJP bodol bono bodolni kariywi rojiya. Sal noichini olose tini BJP Tripura Haste Executive Committeeni No.367/F.2(4)/BJP/TPA/2022, Date: 12/09/2022 Press Releaseni bisingtwi TIPRA Mothani MDC Hongsha Kumar Tripurano BJP bodolni karegwi rogo. Kaisa political bodol aro kaisa political bodolni lukuadongno karegoi romani Tripura hasteni laibumago ibono poila ongkhna hinoi matongwk aro ibo bari uanamasangcha.
Bodolni kare romani pher suika MDC Hongsha Kumar Tripura bodolni raida sabaiphwk hinoi.
Swngmwng Sakago, tomwng Hongsha Kumar Tripura BJP bodolni raida sabaiywk hinklai bo BJP bodolgo tongphugo twmwi bodolni kare roya ongkhna? Bo tabok TIPRA Mothani MDC ongmani olo bono twmwi BJP bodolni hinoi kare rolang tini? Tma pher, lukurok uanalaijak aro sini muchulaijak.
Tini TTAADC-ni salchani Session ongwk Kokchap Nogo. TTAADC-ni achokphang machang Jagadish Debbarma MDC Hongsha Kumar Tripurano TIPRA Motha haphangni phaiching achokthai daiyo achoknani saklaiywk. Iboni olo BJP MDC Bimal Chakmano TTAADC-ni kebengnai bodolni ojama hinoi saklaiywk.
TTAADC-ni kebengnai bodolni katal ojamani bwmwng saklaiyani bagoide MDC Hongsha Kumar Tripurano BJP bodolni kareroya iswk sal, ongoi mano ibobo kaisa pher. Jabwiyo Hongsha Kumar Tripura Bharatiya Janata Janajati Morcha, Dolai Hangkorni twiphang tongmani mator bo i achokthaino yakagwi romani dwkjak. Sani thangklai Hongsha Kumar Tripura BJP bodol daiyo aro krwngsa jegagobo krwi. Aini bagoi bono loge loge bodolni kare rojakliyana, ibobo ongkhna aro kaisa pher.
Mator BJP MDC Hongsha Kumar Tripura BJP bodol yakagwi TIPRA Mothani bana rwngwi salnoichini olo bodolni kare romani ibo Tripura dophani hodago sajagwi phaimani Maiyong thangpaiywi romo kogo hinmani bai barikhlai solaika.
No comments