Tripura Chubalai Buthuno Nakarmwng Bini Nangnai Tipra Mothani Observer Barnaram Tripura: Sachindra Tripura Agartala , 13 September 2022: Tip...

Tripura Chubalai Buthuno Nakarmwng Bini Nangnai Tipra Mothani Observer Barnaram Tripura: Sachindra Tripura

Agartala, 13 September 2022: Tipra Motha TTAADC daiyo hapango achokmani olo bobagra chorok Tiprasarokno thaincha ongnani bagoi jonom sago. Bobagra chorok lukurokno hamjago, chorok hodano hamjago, chorok tongkatharno hamjago. Nini ani hinoibo krwi. Mator Tipra Mothani kisamisa adongrok bobagrani thainchani khorangno sak nangya ongoi uluk-sakango uansokyagwi jani je muchutwi salaiywk-hinlaiywk. Olokhlai dopha bai dopha kha hamlaiya onglaiywk.

Thangnai 8 September 2022 salmarigo TTAADC Village  Committeeni chongbarino naikhogwi 37.Hrishyamukh Blockni Mohininagar ADC Villageni Batua Bari SB School nokhlago daiyo Tipra Mothani kaisa kokchaplaima lukuthung pana songchajago. MDC Debajit Tripura, MDC Bidyut Debbarma, 37. Hrishyamukh Tipra Mothani observer Barnaram Tripura, 37.Hrishyamukh Tipra Motha Block Committeeni Vice-Pesident Navadip Tripura, TWF President Nutanpriya Tripura, YTF Central GS Jiten Tripura song I panago naruai ongoi phaiywi majakphaijak. Naruairokbo nangmani kokno sagwi khnarojak.

Mator panago naruai ongoi majakphainai 37. Hrishyamukh Tipra Mothani observer Barnaram Tripura kok samanino lagwi tabok haste gnangoi tungphlaijak, social media gnangoi luklaijak. Bo koksaphugo Lok Sabhani MP Rebati Tripurano yaisi sugwi satwi-satwi ‘Tripura Chubalai Buthu’ crore crore rang lukurokni daiyo thumgwi lagwi chago hinoi athang-kuthang sachai tongo. Bo arobo saka, MP Rebati Tripura bo Tripura Chubalai Buthuni tangphang tongphugo lukurokni daiyo buthuni bwmwngoi crore crore rang khogwi chajak, I rangno rophaidi. Ibo simingya bo arobo koksilchagwi saka, Tripura Chubalai Buthu lukurokni daiyo rang crore crore khomani rangbai Rebati Tripura Bangladeshgo thangwk……..

Tripura Chubalai Buthuno lagwi Barnaram Tripurani ibotwi nang nangya talsokyano koso kok samani tabok social media gnangoi selengmasangcha ongoi ongwk aro kok kasagwi tongwk. Twmwi hinba, hasteni lukurok siywk Tripura Chubalai Buthu ongkha Tripura dophani kaisa hoda-hukumu motha. Ibobai political party, religionni mwngsa halok krwngjak krwi. Tripura Chubalai Buthu hasteni Tripura dophani hamkraini siming samwng tangya, ibo chorok Tiprasarokni hamkraini bagoi, Tiprasarokni thainchani lamano naikhogwi yapri segwi samwng tangwk. Mator Tipra Mothani Observer braikhlaibo aida kok sagwi lukurokni daiyo hamya koktma rogoi tongo Tripura Chubalai Buthu lukurokni daiyo rang crore crore khogwi chago hinoi. Kaisa political bodolni damsago bachagoi ibotwijati khlai kaisa hoda-hukumu mothano chaiya-chaiya koksilchagwi koksamani ibo barikhlai khasajaknai kok.

Barnaram Tripurani ibotwi nang-nangya kok sagwi Tripura Chubalai Buthuni sakago koksilchamanino twiwi selengmwng phunugwi kokphirokha Tripura Chubalai Buthu, Central Committeeni twiphang machang Sachindra Tripura. Bo social media livego phaiywi sraichakhlai kokphiroka, Tripura Chubalai Buthuni sakago Barnaram Tripura je kok silchaka ibo kwbwiya, ibo aida kokse. Tripura Chubalai Buthu kaisani daiyobo rang khoya, chaiya. Tripura Chubalai Buthu lukurokni hamkraini bagoise samwng tangwk. Barnaram Tripura braikhlai Tripura Chubalai Buthuno rangkhogwi chago hinmaka ibono sraicha kokthum maronai aro Tripura Chubalai Buthuni daiyo, TCB-ni kacham tangphang Rebati Tripurani daiyo nakarmwng bini nangnai phainai salnoi jorani bisingo. Tomwng I salnoi jorani bisingo Tripura Chubalai Buthuni daiyo nakarmwng biya hinklai kerongni raidatwi bini sakago krak yapri sejaknai.

Iro satai klaiywk, thangnai talkisa sakangose Hosom Bhojon chalaiphugo Tripura dophani Naran machang Birendra Tripura bai TTAADC-ni EM Kamal Koloini bisingo kok tansolaimani kaiphe-kaiphe ongmani aro Naranno lachima khlaimanino lagwi haste gnangoi kok kasamani hamroro ongdrop se. Tabok aro uaisa Tipra Mothani observer Barnaram Tripura ibohaiklai Tripura Chubalai Buthu eba Tripura hodani sakago rang chago hinoi aida kok silchagwi Tripura dophano lachimasangcha khlaimani patimwng ibo barikhlai uanamasangcha aro kuthuk uansokjaknai. Barnaram Tripura je koksilchaka ibo bini baithangni kokde, tma bodolni kok, ibobo sraicha khlaiywi roni nango haste lukurokno. 

Je jegago Tipra Mothani ojama bobagra Pradyot Kishore Manikya nini ani hinyagwi chirik chirigoi khaklap bugwi mwktwi khiklai chorok Tiprasarokno thaincha ongdi hino, o jegago Tipra Mothani kisamisa adongrokni ibotwi tongmwng thainchani busu ongoi tongwk. Jora tongsini ibotwijati mothani virusno sai-saiywi kariywi roya hinklai thainchani bwmwngoi arose ualaimwng-soklaimwng sopainai !