Gomati Twimago Klwgwi Langma Chokha Sonatan Tripura Karbook, 14 September 2022: Gomati twimago klwgwi langma chokha bisi bachichar (58) omor...

Gomati Twimago Klwgwi Langma Chokha Sonatan Tripura

Karbook, 14 September 2022: Gomati twimago klwgwi langma chokha bisi bachichar (58) omorni Sonatan Tripura. Koktmago sagwi majakkha, Gomati hangkorni Mandirghatni Gomati Parago tongnai Sonatan Tripura thangnai 9 September salgo baithangni samwngo akhomani jorago rungni klaiywi twi klwkmani aro  naitrulaiywi malailiya bono.

Nukhungni borokrok rung bai naitrulaikha, naitrugwi malailiya. NDRF bodolbo salnoi jora rwngwi naitrulaikha, bokbo naitrugwi karilaimaliya Sonatanno. Iboni olo nukhungni borokrok  uansoklaikha Sonatan Tripura aro kwthang tongliyana hinoi. Paithago 12 September salgo parani lukurok Sonatan Tripurani mangkwthwi twiyo kuplungsajak khlai makha.

Ibotwikhlai achamitini bini langma chomani bai barikhlai kha khamlaijak nukhungni borok, jaitimasa aro Tripura dophani lukurok. Bo khorok sni (7) basa aro hik aro kabangma taku-bukuno klangwi saichung i swngcharno yakalangkha. 

Langma chonai Sonatan Tripura bo Tripura Chubalai Buthu, Central Committeeni rangphang Damodhar Tripurani bataokra klaiywk.