Gondatwisago Lama Hamya, Lukurok Kalijak Barikhlai Jwngjal Kokmalama, 1st July 2022, Gondatwisa: Thangnai jora kabangma rwngwi hastego uatw...
Gondatwisago Lama Hamya,
Lukurok Kalijak Barikhlai Jwngjal
Kokmalama, 1st July 2022, Gondatwisa: Thangnai jora kabangma rwngwi hastego uatwi uamani bai kabangma jegago nok baikha, lama kuakkha. Ibo haiklai Gondatwisa bai Ratannagar thangmani lama kakkhlai klaima bagoi tabok Ratannagar amchaini lukurok thanglaiso khlaitaniyo barikhlai jwngjalgo klaijak.
Gondatwisago samwng-homwng nangoibo thanglaiso khlaini bagoi malkhong cholemiyani, lama kolokma himgwise malkhong makaphaiywk. Rationni mairung-khaikham suragwi lanani, hati chanani, hamya chaiya ongkhlai Gondatwisa Hospitalgo tlangthaniyo yakong bai himgwi maphaimani bai barikhlai jwngjalgo klaijak o amchaini tongkosong tongnai lukurok.
Amchaini lukurok o lamano gam khlaiywi snam roni bagoi uai kabangma khorang tisalaikha. Snamgwi rojaknai hinoibo uai kabangma kok rojakmani olobo o lama tabokbo snamjakya hinoi kok silchakha.
O amchaini lukurokni jwngjalno haste haphang bai ADC haphang khnagwibo khnayaswk, thulaijak sring sring khlai. Aini bagoi lama kakkhlaiywi malkhong cholemiya ongoibo kaisabo snamgwi ronai krwi.
Hastego dopha hamkraini bwmwngoi Tiprasa luku ojamarok sakni muchutwi bodol slailaiywk phor phor khlai. Mator para-hachwk amchaini lukurok braikhlai jwngjalgo klai tong ibono thangoi naithangnai krwi. Bana chongbari kore sopaikhlai simingse khugo luku hamkrai, dopha hamkraini khnatok khnatok kirtonni rachapmwng rachaplaimani khnago. Mator chongbari paikhlai maising jorani chibuk ongoi hakor haklai ari akhonani siya.
O amchaini lukurokni jwngjalno naikhogwi o lamano daktwino snamgwi roni ongthwk hinoi haphangni daiyo kok kwcharkha amchaini obagi lukurok.
No comments