Tangnairokbai Choprojakni Naijakkha ‘The JummSamwngsitrao Times’ bai ‘Swrang Chati’ni Koktmathungnai Kokmalama , 1st July 2022, Chawmanu/S...
Tangnairokbai Choprojakni Naijakkha
‘The JummSamwngsitrao Times’ bai ‘Swrang Chati’ni Koktmathungnai
Kokmalama, 1st July 2022, Chawmanu/Salema: thangnai 29 June salo koktmathungni thangtaniyo samwngsitra tangnairok bai choprojakni naijakkha ‘The Jummo Times’ ni koktmathungnai aro nokphang Sursen Chakma. Koktmago sagwi majakkha, Chawmanu RD Blockni Baganbari, Chalitachara amchaini lukurok lama snamrodi hinoi biywi Bankumari bai Bangamurago lama kasolai tongmani koktma auaini thangtaniyo mwthakdi hinoi amchaini BJP bodolni ojama Mahatma Ranjan Chakma, Padma Ranjan Chakma, Biplab Chakma song ‘The Jummo Times’ni journalistni sakago choprogo hinoi koksilchajakkha. Lukurok lama kasomanino camera tatisadi hinoi theranka. Camera sekni naijakkha. Kabangma lukurok kuthungjakni bagoi bujak-tokjak ongnani yokkha hinoi koktmago sagwi majakkha.
Salema: oijang thangnai 28 June horni damchi jora atlogo siniya-nuya samwngsitra tangnairok ‘Swrang Chati’ channelni koktmathungnai Sushila Debbarmani nukhungo choproni naikha hinoi koktmago sagwi majakkha. Bini para ongkha Ambassani Salema Madhuchara. O hor jorago siniya-nuya bodolsa Sushila Debbarmani kholago bwchalaijakpho thona khlai. Ibono nokni khorokcha bborok numani olo krijagoi noksingo haboi thango. Olo nokni borok kuthungoi phataro akhogoi naimani bok kharoi thango. Koktma sagwi manoi parani lukurokbo kuthunglaikha. Koktma manmani olo loge-loge police Sushila Debbarmani nogo phaiywi naiphaika. Horcha bokno mrwgwi thangka. Koktmathungnai Sushila Debbarmano mwngsa khlaimalangliyaphabo kholago onjak malkhongno sabaini naimani aro bodol bai khitarmani mari makha. Hastego ibotwi patimwng bari uanajaknai!
I kainoi patimwngno lagwi tini 1st July ‘Kokborok MediaForum’ khorang tisaka aro patimwngno lagwi koktma auaimwngni bisingtwi selengmwng phunuka. Forum saka—
“Lai thangnai 27th June 2022 horo Kamalpur amchaini koktwma thumnai bukhuk Suchila Debbarmani nogo siniya nukya borok chopropna naimani patimungno belai selengjakkha 'Kokborok Media Forum'. Abobai baksano thangnai 29 June salmario Chawmanuni Bankumari amchaio lukurok lama kasolaimano koktwma auaina thangwi amchaini kisamisa samwngsitra tangnairok bai koktwma taauaidi, camera tatisadi hinwi chini 'The Jummo Times'ni enchor bai editorno butok khlaijakna naijakmano twiwi belaikhe khaduma phunugo 'Kokborok Media Forum'. Omohai luku chongraidao wngna muchangya patimung sitrarokno kokthai kwrwi sejanani. Abagwino hasteni joto lukurokni kahamni bagwi kokthumui tongnairokno satok pitok khwlaimani mwthaknani koijao 'Kokborok Media Forum'.
Yang abobai baksano Salema thanani Madhucharra kamini kha kaham lukurokno paiphwlaiya hambai mayapharo Forumni bwkhaktwi aswk kotor patimung wngna tongmano pal bachawi kasomani bagwi. Thinangbo haikheno chubalainani sanjao joto lukurokno democracy mwthangwi narwknani bagwi. Chwng Salema Thanani naimwthangroknobo hambai yapharo jorao phaiwi patithaio naiphaimani tai hopung mwrwgwi katimung rwmani bagwi. Phiyaba ah salo koktma auaini thangtanio 'The Jummo Times'no jetwikhe kebengwi camera sekna naikha, butok khlaina naikha tai khuk hamyabai kutukjakma patimungno twiwi sanai mediani freedomno kebo ta kebengthung tumungno yak laikhe chwng kerong lam romnani lama ma sainai hwnwi hojak rwo. Thinangno lukurokni kaham hamya jorao mediarok tongma hai joto lukurokbo jesa jagani phano mediarokno katirwnani swkangwi phaibaijadi hwnwi koijao”.
No comments