21 December 2023, Agartala: Tripura hasteni ST Christianrokno STni kareronani ongthwk hinoi khorang tisagwi phainai 25 December salmarigo e...
21 December 2023, Agartala: Tripura hasteni ST Christianrokno STni kareronani ongthwk hinoi khorang tisagwi phainai 25 December salmarigo ebakhlai haiyong gnangoi hohom dodomni bisingtwi palaijakni thangoi tongmani kwthar Christmas Terni salgo JANAJATI SURAKSHA MANCH, Tripura haste committeeni bwkhaktwi 'Delisting Rally' khlaiywi Agartalani Astabal ground daiyo garakhlai lukukuthungmwng pana songchajaknai hinoi thangnai 19 November salmari Agartalani Press Clubgo koktmathungnai pana ringoi saklaikha Janajati Suraksha Manch. Aini bagoi Janajati Suraksha Manch, Tripura haste committeeni ongoi Manchni Joint Convener Kartik Tripura bo tangnai 12 October 2023, Sadarni SDPOni daiyo permission biywi kokton suijak.
Mator 25 December Christmas Terni salgo JSMni ibotwikhlai 'Delisting Rally' songchani thangmano chajakya ongoi hasteni kabangma lukurok, motharok khorang tisalaikha. Ibo simingya, CPI(M), TIPRA Motha, Congressno lagwi hasteni chorok kebengnai bodolrokbo kothe kothe koktmathungnai pana ringmani bisingtwi ibono kebengwi khorang tisalaikha.
Paithang Sadarni SDPO thangnai 18 December salmarigo Janajati Suraksha Manch, Tripura haste committeeni Joint Convener Kartik Tripurano No. 12206-11/SDPO(SDR)/AGT/2023, Date: 18/12/2023 nomborni bisingtwi kokton suiywi sakokha, nokni permission bimani koktonno gamkhlai chergwi nai naimani olo 25 December Christmas Ter klaiywk, o salgo Christian tongkwtharno paitoknai lukurok kabangma pana skngchagoi tongwk aro Agartala amchaiyo kabangma lama kore-karagobo Christmas Ter palaijagoi tongwk. Aini bagoi o salgo 'Delisting Rally' khlainani bagoi permission rojakliya. Aiphabo 25 Decemberni olo 'Delisting Rally' khlainani bagoi sajakkha.
Ijang hasteni tongkwchangni halokno gamkhlai larwknani bagoi 25 December Christmas Terni salgo Janajati Suraksha Manchno Agartalago 'Delisting Rally' khlainani thangoi tongmano permission roya tongnani krak yapri senani bagoi haido khlaiywi thangnai 19 December salmarigo hasteni montriokra Prof. (Dr.) Manik Sahano kokton suika Tripura Legislative Assemblyni kebengnai bodolni ojama Animesh Debbarma.
No comments