TTAADC Amchai Gnangoi Gamkrwngkhlai Palaijakkha Damchinoini Bandh

1 October 2023, Khumulwng: Tiprasarokni ‘Greater Tipraland’ bimwngni khorangno thainchakhlai Delhigo kasokroni bagoi Tipra Motha TTAADC amch...

1 October 2023, Khumulwng: Tiprasarokni ‘Greater Tipraland’ bimwngni khorangno thainchakhlai Delhigo kasokroni bagoi Tipra Motha TTAADC amchai gnangoi damchinoini Tripura bandh ringmani tongkwchangni bisingtwi jai-jai khlai palaijakkha. 

Chawmanu: phurungni siming Chawmanuni Bankumari lamago MLA Paul Dangshu, Chawmanu Sub-Zonalni achokphang Birendra Tripura, Bihari Boisnob Tripura, Kabita Tripura songni twidulmwng bai lama kasojak-kha. Chawmanu, Manikpur amchaiyo jai-jaikhlai i bandh palaijakkha. 

Mungiakami: bandh rwgwi Mungia-kami lahar kachargo Tipra Mothani lukurokno achoklaiywi lama kasolaikha. Iro thangoi majakkha EM Kamal Koloi. 

Gondatwisa: ijang EM Rajesh Tripurani twidulmani bai Gondatwisago bandh rwgwi lama kasojakkha. 

Hatai Kotor: miyani bandh rwgwi jotoni slai gara khlai kuthunglaimwng bai lama kasojakkha Hatai Kotor amchaiyo. Iro kwchang kwchang khlai lama kasolaiywi tongmani achamitini bomb phekhokmani patimwng rwgwi kisa jwngjal achaikha, huru-buru onglaikha. Olo naimwthangrokni krak naimwng bai patimwng gara ongmaliya. 

Khumulwng: MLA Swapna Debbarmani twidulmwng bai Jiraniani Madavbari lamprago i bandh rwgwi lama kasojakkha. 

Karbook: MLA Sanjoy Manik Tripurani twidulmwng bai bandh rwgwi lama kasojakkha Karbook daiyobo. 

Killa: TTAADCni CEM Purna Chandra Jamatiani twidulmwng bai Killago i bandh rwgwi kuthunglaiywi lama kasojakkha. 

Miyani i bandh Damcherani siming Sabroom joratwi jai-jaikhlai lahar aro railway station kasojakkha.