Amani Kokni Bwmwngno ‘Kok Tripura’ Hinoi Gosegwi Lanani Kok Kwcharkha, Bobagra

1 October 2023, Agartala: hani bobagra Pradyot Kishore Manikyani yaktwi chati sogoi romani bisingtwi Agartala Town Hallgo songchajakkha ‘Cou...

1 October 2023, Agartala: hani bobagra Pradyot Kishore Manikyani yaktwi chati sogoi romani bisingtwi Agartala Town Hallgo songchajakkha ‘Council of Tiprasa Hoda’ni bisinoini kokmalaima pana. 

I kokmalaima panago hasteni kaichibrwi Tiprasa hodani hodaokra aro hodanni lukurok phaiywi majakkha. Hall kwplwng lukurokni kuthungmwng aro thainchani khorang, thainchani phranni baskango bari nangmani kok sagwi khanarokha CTHnni daua (convener) ebakhlai Tripura dophani Naran Birendra Tripura, CTHni kasku ebakhlai Jamatia Hodani kacham hoda okra Padma Lila Jamatia song. 

Panani chengsaphang ebakhlai ha bobagra bobagra saka, bisitham-bisibrwini sakango Tripura hastego aro phatar hastego ‘Council of Tiprasa Hoda’ni bwmwngno kaisabo sininai krwi! Mator jephugo Delhigo thangoi Bharat hapangni Home Ministry bai malaiywi Tiprasani ongoi je kokmalama salaiywi kabokha, iboni nobar Delhigo sipjakni nangkha. Phainai salgo tomwng Tiprasani Constitution Solution manthanigo Council of Tiprasa Hodani samwng-homwng barino gara ongoi tongnai. Taboksak jora Bharat hagara hapang bai jeswk kokmalama achoklaikha, TUJS, ATTF, TNV, INPT, IPFT bai achoklaikha ibo bana Political bodol bai simingse achojagwk. 

Bobagra ibobo saka, Tripura 1949 bisigo Bharatni kaisa bedek ongoi yapri sego. Tripurano Bharat bai krwngrokha mator Tripurago tongnai Tiprasarokno tabokbo hagarani mainstream daiyo twbwimayakho, tmwi? Jesa hapang ongthwk, CPI(M) ongthwk, Congress ongthwk, BJP ongthwk, Motha ongthwk, IPFT ongthwk krwngsaya krwngsagolai chaiya khlaikhna. Chaiya iboni bagoi ongkha chwng jonom sakni bagoi uansokha, sakni dophani bagoi uansokliya! 

Hapango phran phainani mwngsa jwngjalya, mator ibo braijati phran iro sakni dophani mathai-soktai maya? Ibo braijati haste, iro bana Agartala, Udaipur, Dharmanagargo siming hamkrai ong? Jagabandu, Raishyabari, Sabroom, Killa, Raima Valley, Karbook, Takarjala, Khowaigo hamkrai ongya? Aini bagoi Tripurano ‘Ek Tripura Shrestha Tripura’ hinoi samayakho! 

Tripura dophani Naran Birendra Tripura kok samanino gam manjagwi aro kok manjugoi bobagra arobo saka, nohk Partyni udungo tathangdi, nohk Council of Tiprasa Hodano krak khlaidi. Aiphu naidi Party nini udungo sopainai. 

Bobagra arobo saka, tabok chwng suitai daiyobo khakjaklaijak, kok daiyobo khakjalaijak. Tripurago sakni amani kokni bagoi kebo sago Kokborok, kebo sago Kaubru. Ang ‘Council of Tiprasa Hoda’no kaisa kokbiti roni naiywk, nohk tmwi saya ‘Kok Tripura’, chwnglai chorokse 

Tiprano tongmani. Kok/Kok Tipra tma pherlaimani tong? 

Bo arobo saka, Tripurago chwng gira gira mandwino lagwi sak sak khakjak-laiywk. Thaincha krwini bagoino Mizoramgo chwngno bigra snamjagwi tongkha chini Brurokno. Jephugo chwng thaincha ongmakha, aiphugo Brurokno Tripurago tongthai rokha.