Songrongma Terni Paithak Salgo Thangoi Majakkha Hodaokrarok

14 September 2023, Khumulwng:  bisipoti songchajakmani kosol takhlaibo ‘Bru Songrongma Mthoh’ni bwkhaktwi uainoichinoi haste beremni Songron...

14 September 2023, Khumulwng: bisipoti songchajakmani kosol takhlaibo ‘Bru Songrongma Mthoh’ni bwkhaktwi uainoichinoi haste beremni Songrongma Ter hohom-dodomni bisingtwi songchajakkha  Manu Bazarni Dakhalsing Reang Parago. 

Miya I terno chengoi rokha Tripura hasteni kacham montriokra yakchu Jishnu Devvarma. Thangoi majakkha hasteni montri Bikash Debbarma, montri Sukla Charan Noatia song.

I panani achokphang ongoi achokkha Bru Songrongma Mthoh bai chongjak Reang dophani Kaskau Khabarai Reang.

Tini I terno paithak sal rwgwi songchajak panago thangoi majakkha hasteni kothe kothe Tiprasa Hodani hodaokrarok. 

Hoda okrarokni bisingo thangoi majakkha  Tripura dophani Naran ebakhlai Council of Tiprasa Hodani Convener Birendra Tripura, Tripur Kshatriya Samajni twiphang ebakhlai Council of Tiprasa Hodani twiphang Jogendra Debbarma, Rupini Samajni okra ebakhlai  Council of Tiprasa Hodani twiphang yakchu Chandraday Rupini, Murasingh Hodani tangphang ebakhlai Council of Tiprasa Hodani tangphang Sunil Murasingh, Noatia Hodani twiphang yakchu Binoy Lal Noatia, Jamatia Hodani ongoi Karuna Bijoy Jamatia, Tripura Rajya Chakma Samajik Parishadni twiphang Debjan Chakma song.

Tinini i panago phaiywi majakjak kothe kothe Tiprasa dophani Hoda okrarok Tiprasa Hodani bisingo kaisa bai kaisa kwthalai, krwnglai halok gamkhlai bogwi tonglainani, kisamisa kokrokno lagwi kokbanglaimani aro jwngjal onglaimanino hamronani rwgwi nangmani kokmalama salaijakkha.

I panani achokphang ongoi achokkha Bru Songrongma Mthoh bai chongjak Reang dophani Kaskau Khabarai Reang.

Ijang TTAADC hapangni bwkhaktwi sirisitini SANGRONGMA TER rwgwi salsani habalengkhoma saklaijak. TTAADC hapangni Chief Executive Officeni siming No. F.7-2(272)/GL/2022/16, 018-107, Dated, Khumulwng, 12/09/2023 notification balai kareywi i saklaimwng rokha.